Kryeministri në detyrë i Kosovës, Albin Kurti, ka zhvilluar një takim virtual me Ministrin Francez të Deleguar për Evropën, Benjamin Haddad, në vazhdim të diskutimeve të mëparshme të mbajtura në Pallatin Elize.
Sipas njoftimit zyrtar, gjatë takimit, Kurti ka theksuar përkushtimin e Kosovës në procesin e integrimit evropian, duke shprehur pritjet për marrjen e Pyetësorit të Komisionit Evropian, si hap drejt statusit të vendit kandidat.
Sipas tij, ky proces ndihmon në avancimin e reformave të brendshme, veçanërisht në administratën publike dhe sistemin e drejtësisë.
Bisedimet mes dy palëve u fokusuan edhe në bashkëpunimin me Francën në kuadër të organizimit të Lojërave Mesdhetare 2030 në Kosovë, të cilat u vlerësuan si mundësi për forcimin e lidhjeve ekonomike dhe kulturore ndërmjet dy vendeve, si dhe për rritjen e investimeve dhe tregtisë.
Po ashtu, Kurti ka shprehur synimin për thellimin e bashkëpunimit në fushën e sigurisë dhe mbrojtjes, në kuadër të transformimit të Forcës së Sigurisë së Kosovës në përputhje me standardet euroatlantike./teve1.info/
