Publicisti, Kim Mehmeti ka komentuar zhvillimet brenda koalicionit VLEN, në prag të kongresit të parë të paralajmëruar për më 9 maj, ku pritet të formalizohet bashkimi i tij në një subjekt të vetëm politik.
Në emisionin “Këndi i Debatit” në Tëvë1, Mehmeti është shprehur skeptik për këtë bashkim, duke theksuar se VLEN nuk do të arrijë të funksionojë si një parti e vetme, edhe nëse formalizohet.
Ai ka shtuar se, nëse do të kishte bashkim të sinqertë, nuk do të kishte nevojë për dy kryetarë apo për struktura të ndara brenda koalicionit.
“VLEN kurrë nuk do të funksionojë si një parti, është bindja ime. Ata bashkohen vetëm që ta gënjejnë popullin. Nuk duan të bëhen një parti, sepse nëse do të donin, nuk do të kishte nevojë për dy kryetarë apo për një alternativë që nuk hyn askund. Këta dy kryetarë, pra këto dy parti, do të vazhdojnë të ekzistojnë, por tani si një e vetme në dukje”, ka deklaruar ai.
Mehmeti e ka cilësuar këtë proces si një lojë politike, duke kritikuar mënyrën se si, sipas tij, po paraqitet para opinionit publik.
Sipas tij, ky bashkim është vetëm formal dhe nuk përfaqëson një unifikim real të strukturave politike.
“Pra, e gjitha është një lojë e poshtër politike që i shitet popullit të vet dhe ka vetëm një qëllim: ta vërë popullin në gjumë dhe ta bëjë të mendojë se gjithçka është në rregull, që më pas t’i shërbehet më rehat palës maqedonase. Dhe pastaj të vazhdohet të thuhet se BDI-ja e ka fajin për çdo gjë, sepse për çdo të keqe thonë se BDI i ka fajet. Për mua nuk është tragjike kjo që ndodh me VLEN-in, por tragjike është se shqiptarët në Maqedoni janë një popull pa mëmëdhe”, ka përfunduar Mehmeti.
Ndryshe, njëri nga liderët e VLEN, Izet Mexhiti, ka njoftuar se më 9 maj do të mbahet kongresi i parë i kësaj lëvizjeje, i cili do të shënojë bashkimin dhe shndërrimin e saj në një parti të vetme politike.
Ai nënvizoi se ky koalicion ka arritur të ndryshojë dinamikën e skenës politike shqiptare në vend, duke thyer dominimin e BDI.
“VLEN arriti të depomonopolizojë skenën politike shqiptare në Maqedoni, të vendosë konkurrencë dhe t’i japë fund monopolit 20-vjeçar të BDI-së”, u shpreh Mexhiti./teve1.info/
