Çmimet e prodhimeve bujqësore në Kosovë janë rritur për 5.8 për qind gjatë tremujorit të parë të vitit 2026, krahasuar me të njëjtën periudhë të vitit paraprak.
Sipas të dhënave të publikuara nga Agjencia e Statistikave të Kosovës, rritje më e theksuar është shënuar te prodhimet bimore, me 7.0 për qind, ndërsa prodhimet blegtorale kanë shënuar rritje prej 4.9 për qind.
“Në TM1 2026, indeksi i çmimeve të prodhimeve bimore ka rritje për 7,0 %, krahasuar me periudhën e njëjtë të vitit 2025. Indeksi i çmimeve të prodhimeve blegtorale ka rritje për 4,9 %, krahasuar me periudhën e njëjtë të vitit 2025. Kurse, indeksi i përgjithshëm i prodhimeve bujqësore ka rritje për 5,8 %”, thuhet në raport.
Në kuadër të prodhimeve bimore përfshihen grupe si drithërat, bimët foragjere, perimet, patatet dhe pemët.
Ndërkaq, në prodhimet blegtorale përfshihen kategoritë e kafshëve si gjedhe, dele, derra dhe pula, bazuar në peshën e gjallë, si dhe produktet si qumështi, vezët dhe mjalti.
Të gjitha çmimet janë llogaritur në euro, ndërsa njësitë matëse janë kilogram, litër dhe copë./teve1.info/
