Ushtruesja e detyrës së presidentes së Kosovës, Albulena Haxhiu, do të zhvillojë nesër një takim konsultativ me përfaqësues të partive politike për të diskutuar caktimin e datës së zgjedhjeve të parakohshme parlamentare.
Në njoftimin e publikuar nga Zyra për Media e Presidencës bëhet e ditur se, takimi do të mbahet në orën 15:00.
“Në orën 15:00, Ushtruesja e Detyrës së Presidentes së Republikës së Kosovës, Albulena Haxhiu pret në takim konsultativ partitë politike për caktimin e datës së zgjedhjeve të parakohshme. Mediat mund të marrin pamje në fillim të takimit”, thuhet në njoftimin zyrtar.
Takimi është konfirmuar edhe nga zëdhënësi i Lidhjes Demokratike të Kosovës, Besian Mustafa, i cili bëri të ditur se këtë parti do ta përfaqësojë anëtarja e kryesisë, Jehona Lushaku.
Ndryshe, ky takim vjen pasi më 28 prill, Kuvendi i Kosovës dështoi të zgjedhë presidentin e ri brenda afatit kushtetues të përcaktuar nga Gjykata Kushtetuese e Kosovës në aktgjykimin e 25 marsit.
Ndërkohë, Lëvizja Vetëvendosje kishte tërhequr kandidaturat e Glauk Konjufca dhe Fatmire Mulhaxha Kollçaku, duke propozuar më pas aktivistet për të drejtat e njeriut, Feride Rushiti dhe Hatixhe Hoxha për postin e presidentes.
Megjithatë, në seancën e nisur më 27 prill dhe që vazhdoi deri në mesnatën e 28 prillit, partitë opozitare nuk morën pjesë, duke pamundësuar sigurimin e kuorumit për zgjedhjen e presidentit të ri.
Në bazë të aktgjykimit të Kushtetueses, Kuvendi është shpërndarë dhe Kosova duhet të mbajë zgjedhje të reja brenda 45 ditësh.
Haxhiu ka afat prej dhjetë ditësh për të caktuar datën e zgjedhjeve, ndërsa si opsione për mbajtjen e tyre përmenden 31 maji dhe 7 qershori.
Sot gjatë ditës, Haxhiu ka zhvilluar takim edhe me kryesuesin e Komisionit Qendror të Zgjedhjeve, Kreshnik Radoniqi, në kuadër të përgatitjeve për procesin zgjedhor./teve1.info/
