Ka përfunduar seanca e jashtëzakonshme e Kuvendit të Kosovës, e thirrur nga Lëvizja Vetëvendosje, ku është diskutuar për procesin e zgjedhjes së presidentit të vendit.
Gjatë seancës, kryeministri i Kosovës, Albin Kurti, tha se vendi ndodhet në fund të afatit kushtetues për zgjedhjen e presidentit dhe paralajmëroi se dështimi mund ta çojë vendin në zgjedhje të reja.
“Sot kemi mbërritur në fund të afatit kushtetues për zgjedhjen e Presidentit të Republikës. Dështimi e dërgon vendin në zgjedhje të reja, që do të ishin të pestat me radhë brenda 16 muajve”, deklaroi Kurti.
Ai gjithashtu hodhi poshtë akuzat se partia e tij shmang përgjegjësinë për qeverisje.
“Akuzat se VV-ja ikën nga përgjegjësia nuk janë të vërteta. Nuk ka pasur asnjë vonesë, as ngurrim dhe as shmangie në marrjen e përgjegjësive për të qeverisur”, tha ai.
Kurti theksoi se Vetëvendosje ka qenë e gatshme për kompromis politik, por jo për “pazare politike”.
“Marrëveshja dhe kompromisi janë gjëja më normale në demokraci, por kompromisi nuk është pazar për të rehatuar figura politike”, u shpreh ai.
Ai shtoi se ka propozuar bashkëpunim me opozitën për zgjedhjen e presidentit, duke kërkuar tre emra konsensualë.
“E ftuam PDK-në dhe LDK-në që bashkërisht të propozojmë tre emra unifikues, jashtë skenës aktuale politike”, deklaroi Kurti, duke shtuar se oferta nuk është pranuar.
Ndërkohë, përfaqësues të qeverisë dhe shumicës parlamentare akuzuan opozitën për bllokim të procesit dhe mungesë bashkëpunimi.
Zëvendëskryeministri Glauk Konjufca tha se opozita po tenton të shfrytëzojë situatën për qëllime politike.
“Opozita po përpiqet që përmes çështjes së presidentit të krijojë krizë dhe të shkojë drejt zgjedhjeve”, tha Konjufca.
Ndërkohë, seanca u shoqërua edhe me mungesë të pjesëmarrjes së disa partive opozitare, gjë që sipas zyrtarëve të pushtetit ka penguar procesin kushtetues të zgjedhjes së presidentit.
