Deputetja e Partisë Demokratike të Kosovës (PDK), Vlora Çitaku, ka reaguar ndaj qeverisë, duke e akuzuar për mungesë rezultatesh pavarësisht pushtetit të plotë që, sipas saj, e ka pasur për gjashtë vite.
Në reagimin e saj, Çitaku ka vënë në pikëpyetje arsyetimet e shumicës qeverisëse për bllokada nga opozita.
“Për besë, për gjynah jeni, edhe pse i keni pasur të gjitha nivelet e pushtetit tash e 6 vite. Hajde na tregoni: si paska mundësi që opozita ju ka bllokuar për të bërë punë të mira për këtë vend, kur i keni 66 deputetë në Kuvend? Shumicë solide”, ka shkruar ajo.
Ajo ka theksuar se opozita nuk ka penguar procese të rëndësishme, duke përmendur votimin e marrëveshjeve ndërkombëtare dhe zgjatjeve buxhetore.
“S i ju ka bllokuar opozita që ka votuar çdo marrëveshje ndërkombëtare për Kosovën? Që i ka votuar zgjatimet buxhetore. Diçka që ju nuk e keni bërë kurrë sa ishit në opozitë”, ka shtuar Çitaku.
Në fund, deputetja e PDK-së e cilësoi qeverinë si “të paaftë”.
