Koordinatori i Departamentit për Drejtësi në kuadër të Kabinetit për Qeverisje të Mirë të PDK-së, Përparim Gruda, tha se në takim me kryeministrin Kurti kishte vullnet pozitiv për të gjetur pika të përbashkëta.
Gruda tha se rekomandim i PDK-së ishte që procesi i Vettingut të kalojë në Kuvend. Ai tregoi për propozimet e tyre karshi Qeverisë.
“Ne kemi dhënë një propozim konkret, dhe propozimi ynë ishte ky: të themelohet një Komision i veçantë, ose Komision i posaçëm parlamentar nga të gjitha partitë parlamentare të Kosovës, sigurisht i kryesuar nga Lëvizja Vetëvendosje si partia më e madhe. Nuk e kontestojmë të drejtën e saj… Ky Komision do të themelonte një grup punues të ekspertëve më eminent vendor dhe ndërkombëtar, të cilët do të merrnin një kohë të caktuar për t’i përgatitur amandamentet kushtetuese, draftligjin për Vettingun dhe më pas do t’i sillnin në seancë për miratim”, tha ai në “Ditari” në Tëvë 1.
Gruda theksoi se ka mbetur që të zhvillohen edhe konsulta të tjera për të marrë një vendim final.
“Nuk mund të them që është hedhur poshtë, dhe është vlerësuar ideja jonë, por as nuk mund të them që është pranuar ideja jonë. Ka mbetur që të zhvillohen konsulta të tjera për të marrë një vendim final. Por mund të them që kishte një vullnet të mirë, që të gjindet një…mënyrë veprimi për të ecur tutje në këtë proces”, shtoi ai.
Pas këtij takimi, kreu i kësaj partie, Memli Krasniqi, ka thënë se për të zbatuar një proces të tillë, është i domosdoshëm një konsensus i gjerë ndërmjet partive politike parlamentare, shoqërisë civile dhe ekspertëve të fushës. /Teve1.info/
