Policia e Kosovës ka bërë të ditur se më 16 prill 2026 është mbajtur ceremonia përmbyllëse e trajnimit të avancuar “Rural Enforcement Operations (REO)”, i organizuar nga Programi për Asistencë Kundër Terrorizmit (ATA) i Departamentit të Shtetit të Shteteve të Bashkuara të Amerikës.
Ky trajnim është realizuar në bashkëpunim me Zyrën Rajonale të Sigurisë pranë Ambasadës Amerikane në Prishtinë dhe Policinë e Kosovës.
Sipas njoftimit zyrtar, në trajnimin gjashtëjavor morën pjesë 24 pjesëtarë të Njësisë Speciale Intervenuese (NJSI), e konsideruar si njësia më elitare e Policisë së Kosovës, ndërsa programi u udhëhoq nga tetë instruktorë ndërkombëtarë të specializuar.
Policia e Kosovës vlerësoi se trajnimi është realizuar me sukses të lartë, duke ndikuar në avancimin e kapaciteteve profesionale dhe operacionale për përballje me situata me rrezikshmëri të lartë dhe komplekse.
Gjatë këtij programi, pjesëmarrësit kanë zhvilluar aftësi në fusha të ndryshme, përfshirë operacionet taktike në mjedise rurale, reagimin ndaj kërcënimeve terroriste, vendimmarrjen taktike dhe koordinimin në kushte reale operative.
Në ceremoninë përmbyllëse morën pjesë drejtues të lartë të Policisë së Kosovës, si dhe përfaqësues të Ambasadës së Shteteve të Bashkuara në Prishtinë.
Me këtë rast, u ndanë certifikata mirënjohjeje për instruktorët dhe përfaqësuesin e Zyrës Rajonale të Sigurisë, në shenjë vlerësimi për kontributin dhe bashkëpunimin profesional.
Policia e Kosovës shprehu mirënjohje për Qeverinë e SHBA-së, Programin ATA dhe Ambasadën Amerikane në Prishtinë për mbështetjen e vazhdueshme, duke e cilësuar këtë bashkëpunim si kyç për modernizimin e kapaciteteve të sigurisë dhe forcimin e sundimit të ligjit.
Sipas Policisë, partneriteti i tillë përfaqëson një model të suksesshëm për zhvillimin e mëtejmë të institucioneve dhe garantimin e sigurisë së përgjithshme në vend./teve1.info/
