Gjykata Themelore në Prishtinë ka caktuar masën e paraburgimit prej 30 ditësh ndaj katër të dyshuarve A.D., M.B., S.Sh. dhe M.Sh., të arrestuar në një operacion kundër narkotikëve ku janë sekuestruar rreth 17.9 kilogramë heroinë.
Operacioni është zhvilluar më herët në komunën e Ferizajt, ndërsa të dyshuarit po hetohen për pjesëmarrje në grup kriminal të organizuar dhe për veprën penale “blerja, posedimi, shpërndarja dhe shitja e paautorizuar e narkotikëve, substancave psikotrope ose analoge”.
Sipas njoftimit të Gjykatës Themelore në Prishtinë, Departamenti Special ka aprovuar kërkesën e Prokurorisë Speciale të Republikës së Kosovës për caktimin e masës së paraburgimit për secilin të pandehur në kohëzgjatje prej një muaji.
“Gjykata vlerësoi se ekziston rrezik real që të pandehurit t’i shmangen procedurës penale dhe të mos i përgjigjen organeve të drejtësisë. Natyra e veprave penale, mënyra e organizuar e kryerjes së tyre, shtrirja ndërkufitare e aktivitetit kriminal dhe sasia e madhe e narkotikëve të sekuestruar tregojnë se nuk ka masë më të butë që do të neutralizonte rreziqet”, thuhet në njoftim.
Të dyshuarit kanë të drejtë ankese në Gjykatën e Apelit përmes Gjykatës Themelore në Prishtinë.
