Petrit Ajeti do të vazhdojë të udhëheqë Agjencinë e Kosovës për Inteligjencë (AKI) edhe për pesë vjet të tjera.
Vendimi për vazhdimin e mandatit të tij është nënshkruar nga ushtruesja e detyrës së presidentes së Kosovës, Albulena Haxhiu, dhe kryeministri Albin Kurti.
Sipas njoftimit të Presidencës, ky vendim pasqyron vlerësimin institucional për punën dhe lidershipin e Ajetit në krye të këtij institucioni të sigurisë.
“Ky vendim pasqyron vlerësimin institucional për profesionalizmin, përkushtimin dhe punën e deritanishme të z. Ajeti në udhëheqjen e Agjencisë së Kosovës për Inteligjencë, si dhe besimin në vazhdimësinë e lidershipit të tij në forcimin e kapaciteteve të inteligjencës dhe sigurisë së Republikës së Kosovës”, thuhet në njoftim.
Në komunikatë theksohet se gjatë mandatit të tij, AKI ka luajtur rol të rëndësishëm në mbrojtjen e rendit kushtetues, sigurisë kombëtare dhe interesave strategjike të vendit.
Po ashtu, është vlerësuar edhe angazhimi i institucionit në bashkëpunimin ndërkombëtar.
“Ofrimi i vazhdueshëm i kontributit për sigurinë rajonale dhe më gjerë në kuadër të bashkëpunimit ndërkombëtar” përmendet si një nga aspektet kyçe të punës së AKI-së gjatë kësaj periudhe.
Petrit Ajeti ka qenë në krye të AKI-së gjatë pesë viteve të fundit. Ai ka përfunduar studimet në shkencat politike në Universitetin e Prishtinës “Hasan Prishtina”, në Akademinë Ushtarake “Skënderbej” në Tiranë, si dhe studimet master në Universitetin Metropolitan të Londrës.
Gjithashtu, ai ka ndjekur programe të shumta të zhvillimit profesional në fushën e sigurisë në Gjermani dhe në Shtetet e Bashkuara të Amerikës.
