Qëllimin kishin arritur për ta thyer kufirin shqiptaro-shqiptar.
E më pas, në borë e shi, kishin luftuar për tri ditë e tre netë.
Por në momentet kritike të 11 prillit, Agim Ramadani gjeti vdekjen.
Në vendin e ashtuquajtur “Rrasa e Zogut”, forcat serbe e qëlluan atë në pjesën e epërme afër zemrës.
Këtë të shtunë, shënohen plot 27 vjet nga flijimi i “Katanës”.
Figurën e tij legjendare, e përkujtuan familjarë e dashamirë.
I biri i tij, Jetoni, nën emocione, bëri thirrje për unitet dhe ruajtje të vlerave të luftës.
“Babi nuk jetoi për vete. Ai jetoi për lirinë, dhe atë rrugë e ndau me juve. Ju ishit forca e tij, arsyeja pse ai nuk u ndal kurrë…Në emër të familjeve të dëshmorëve ju lutem qëndroni bashkë, mos lejoni që sakrifica të zbehet. Ndërtoni shtetin ashtu siç e ëndërruan ata që dhanë gjithçka”, deklaroi djali i heroit, Jeton Ramadani.
Lavde për “Katanën” pati edhe bashkëluftëtari i tij, Anton Quni.
“Si ushtarak karriere, ai zotëronte disiplinën dhe ftohtësinë e duhur për betejë. Por, brenda asaj uniforme të Ushtrisë Çlirimtare të Kosovës, rrihte zemra fisnike e një poeti dhe piktori. Ai e dinte se liria nuk mbrohet vetëm me plumb, por edhe me kulturë dhe identitet”, tha bashkëluftëtari, Anton Quni.
Mesazhe përkujtimore dhanë edhe përfaqësues institucionalë.
“Beteja e Koshares, si beteja më e lavdishme e historisë sonë moderne, përtej të qenit operacion ushtarak, ishte edhe ndërhyrje në vetëkuptimin e kufirit. Kur u thye ai kufi, u shkatërrua edhe një kufi tjetër. Ai që kishim brenda vetes”, tha nënkryetari i parë i Kuvendit të Kosovës, Ardian Gola.
“Agim Ramadani mbetet figurë e veçantë edhe sepse te ai bashkoheshin si rrallë ndonjëherë ndjeshmëria e njeriut krijues dhe disiplina e ushtarakut profesionist. Kjo e bën edhe më të fuqishme trashëgiminë që ai na ka lënë”, tregoi ministri i Rinisë dhe Sportit, Blerim Gashani.
Pas rënies së tij, Brigada 138 e Zonës Operative të Dukagjinit u emërua “Agim Ramadani”.
