Kryetari i Prishtinës, Përparim Rama, ka reaguar në lidhje me ndërhyrjet e fundit të ujësjellësit në rrugët e kryeqytetit, pas dëmtimit të asfaltit në rrugën “Ahmet Krasniqi”.
Përmes një postimi në Facebook, ai theksoi se ujësjellësi ka detyrim të njoftojë Komunën për çdo punim që përfshin prerjen e asfaltit apo trotuareve. Sipas tij, Komuna u ka dërguar një shkresë zyrtare për t’i rikujtuar këtë obligim, duke kërkuar që, përveç rasteve emergjente, ndërhyrjet të mos kryhen gjatë orëve me ngarkesë të lartë trafiku.
Rama bëri të ditur gjithashtu se është kërkuar që për çdo ndërhyrje të informohet edhe Drejtoria e Investimeve Kapitale, në mënyrë që të ndërhyhet pa vonesë për rregullimin dhe asfaltimin e pjesëve të dëmtuara.
Ai përmendi rastin konkret në rrugën “Ahmet Krasniqi”, ku sipas tij, prerja e asfaltit ishte lënë pa u rregulluar, duke shkaktuar pengesa në qarkullim dhe duke paraqitur rrezik për sigurinë e qytetarëve.
