Me ndeshje derbi do të hapet dhe me përballje derbi do të mbyllet, xhiroja e nëntë e Superligës së Kosovës në futboll.
Kjo xhiro nis sot martën dhe përfundon të enjten, me dy përballje derbi që pritet ta tërheqin vëmendjen e adhuruesve të futbollit kosovar.
Me derbin Ballkani – Drita, që zhvillohet tsot nga ora 14:00 nis xhiro e nëntë, ndërsa ndeshja do të luhet në Suharekë.
Ballkani është i katërti në tabelë me 13 pikë, dy më shumë se Drita që është e pesta dhe xhiron e shkuar u mposht në shtëpi nga Malisheva.
Sot, por prej orës 18:00, zhvillohet edhe dueli ndërmjet Gjilanit dhe Drenicës, skuadra këto që janë afër njëra tjetrës në tabelë dhe vetëm me një pikë diferencë.
Të mërkurën nga ora 14:00, në Drenas do të përballen Feronikeli ’74 me Llapin kurse prej orës 18:00, Dukagjini e pret në Klinë skuadrën e Vushtrrisë.
Xhiro do të mbyllet të enjten me derbin ndërmjet Malishevës dhe Prishtinës, skuadra që ndajnë dy pozitat e para në tabelë me nga 19 pikë.
Kjo ndeshje nis nga ora 14:00 në stadiumin “Liman Gegaj”.
