Deputeti i LDK-së, Lutfi Haziri, në seancën plenare të Kuvendit të Kosovës ka kërkuar nga kryeministri Albin Kurti që të raportojë në Kuvend lidhur me marrëveshjen e arritur me ndërmjetësuesin e Bashkimit Evropian.
Ai theksoi se deputetët kanë të drejtë të informohen në detaje për përmbajtjen dhe qëllimin e kësaj marrëveshjeje, sidomos për aspektet që lidhen me arsimin dhe shëndetësinë për komunitetin serb në Kosovë.
Sipas Hazirit, mungesa e transparencës ka krijuar paqartësi dhe shqetësim te qytetarët, prandaj ai vlerëson se është obligim institucional që Kuvendi të ketë informacione të plota mbi këtë çështje.
“Kryeministri i Republikës duhet me ardhë dhe me na njoftua për marrëveshjen me Peter Sorensen ndërmjetësin e BE-së, lidhur me qëllimin e kësaj marrëveshje, implementimin e kësaj marrëveshje lidhur me arsimin dhe shëndetësinë për komunitetin serb. Me çka ka të bëjë? Cila është baza? Dhe shpjegime të domosdoshme sepse ka mjegull dhe paqartësi tek qytetarët e Republikës, shqetësim duhet të jetë i Kuvendit të Republikës, ne bartim këtë të drejtë. Deputetët duhet të njoftohen me detajet e kësaj marrëveshje”, tha Haziri./teve1.info/
