SHBA-ja dhe Irani kanë rënë dakord për një armëpushim dyjavor të martën, duke ndaluar 40 ditë sulmesh SHBA-Izrael ndaj Iranit, të cilat e kishin çuar rajonin në prag të një lufte më të gjerë.
Donald Trump njoftoi se kishte pezulluar planet e tij për të përshkallëzuar sulmet në të gjithë Iranin, ndërsa Teherani ra dakord të rihap ngushticën e Hormuzit gjatë periudhës dyjavore.
Shtëpia e Bardhë njoftoi poashtu se edhe Izraeli ka rënë dakord për armëpushimin.
E gjithë kjo erdhi pas ndërmjetësimit të Pakistanit, i cili pak para se të skadonte afati i përcaktuar nga Trump, i kërkoi atij që të të shtynte afatin për dy javë.
Trump tha se ka marrë një propozim prej 10 pikash nga Irani ndërmjet ndërmjetësuesve pakistanezë, i cili ishte “një bazë e zbatueshme në të cilën do të negociohej”.
Më parë SHBA-ja i kishte dërguar një propozim armëpushimi prej 15-pikash Iranit, gjë e cila ishte refuzuar nga lidershipi iranian.
Mediat shtëtërore iraniane raportuan se Irani do të pranojë përfundimin e luftës pasi të finalizohen detajet në përputhje me një plan paqeje prej 10 pikash.
Sipas medieve shtetërore iraniane, lista prej 10 pikash përfshin një numër kushtesh të cilat SHBA-ja i kishte refuzuar në të kaluarën. Ato përfshijnë:
Heqja e të gjitha sanksioneve parësore dhe dytësore ndaj Iranit.
Vazhdimi i kontrollit iranian mbi ngushticën e Hormuzit.
Tërheqja ushtarake amerikane nga Lindja e Mesme.
Një fund i sulmeve ndaj Iranit dhe aleatëve të tij.
Lirimi i aseteve të ngrira iraniane.
Një rezolutë e Këshillit të Sigurimit të OKB-së që e bën çdo marrëveshje të detyrueshme.
Në versionin e publikuar në persisht, Irani përfshiu gjithashtu frazën “pranimi i pasurimit” për programin e tij bërthamor.
Irani do të zbatojë një tarifë deri në 2 milionë dollarë për anijet që kalojnë nëpër ngushticë, të cilat do të ndahen me Omanin. Këto para, Irani do t’i përdorë për rindërtimin e vendit.
Ministri i Jashtëm iranian, Abbas Araghchi, tha se kalimi i sigurt nëpër ngushticë do të lejohej nën menaxhimin ushtarak iranian. Nuk ishte menjëherë e qartë nëse kjo do të thoshte që Irani do të lironte plotësisht kontrollin e tij mbi rrugën ujore.
Nëse bisedimet e paqes dështojnë, Teherani mund të kërkojë përsëri ta mbyllë ngushticën.
Vlen të theksohet se Irani nuk kishte kontroll mbi ngushticën e Hormuzit para konfliktit. Derisa Trump nuk ka komentuar mbi kërkesat e Iranit në mënyrë specifike, ai ka thënë se SHBA-ja do të “ndihmojnë me rritjen e trafikut në ngushticën e Hormuzit”.
Zyra e kryeministrit izraelit Benjamin Netanyahu tha se Izraeli mbështet vendimin e SHBA-së për të pezulluar sulmet kundër Iranit për dy javë, por se armëpushimi nuk përfshin Libanin. Kryeministri i Pakistanit kishte thënë më parë se armëpushimi i rënë dakord mbulonte “kudo, përfshirë Libanin”.
Kryeministri i Pakistanit, Shehbaz Sharif, i cili ndihmoi në ndërmjetësimin e armëpushimit, tha në një postim në X se kishte ftuar delegacionet iraniane dhe amerikane të takoheshin në Islamabad të premten.
Teherani ka thënë se do të marrë pjesë në bisedime. Shtëpia e Bardhë tha se po shqyrton mundësinë e bisedimeve ballë për ballë me Iranin, por ato nuk janë finalizuar ende, sipas raportimin të Guardian./teve1.info/
