Në mbledhjen e sotme, Qeveria e Kosovës miratoi një sërë projektligjesh, duke përfshirë Projektligjin për masat e përkohshme të produkteve themelore në rastet e veçanta të destabilizimit në treg dhe Projektligjin për sigurimin e detyrueshëm shëndetësor, të cilët ishin rrëzuar nga Gjykata Kushtetuese në vitin 2024.
Ekzekutivi miratoi gjithashtu Projektligjin për shtetësinë, i cili sipas ministrit të Punëve të Brendshme, Xhelal Sveçla, do të përfitojë edhe diaspora.
Ai tha se ligji synon të lehtësojë rikthimin e shtetësisë së Kosovës për qytetarët që e kanë humbur atë për shkak të kufizimeve të shteteve të tjera.
Gjatë mbledhjes, qeveria ndau mjete financiare për Luginën e Preshevës dhe emëroi bordin e drejtorëve të Ndërmarrjes Publike Hidrodrini në Pejë.
Kryesuese u emërua Qëndresa Kukaj-Prelvukaj, ndërsa anëtarë të bordit janë Naim Haziri, Mjellma Vokshi dhe Ismet Fekaj.
Për më tepër, qeveria ndau mbi 2 milionë euro për Komisionin Qendror të Zgjedhjeve (KQZ) për mbulimin e obligimeve të papaguara që rrjedhin nga organizimi i zgjedhjeve të parakohshme të mbajtura më 28 dhjetor të vitit të kaluar.
