Të parët u mblodhën familjarët.
E më pas, edhe qytetarët e krerët institucional.
Kësisoj, të gjithë bashkë, këtë të shtunë u drejtuan me lule në duar për homazhe te varrezat e familjeve Bogujevci dhe Llugaliu, për të vazhduar më pas drejt varreve të familjes Duriqi.
E gjitha kjo, në 27-vjetorin e masakrës së këtyre 3 familjeve, një nga krimet më të rënda të forcave serbe ndaj civilëve gjatë luftës në Kosovë.
Mes të pranishmëve në homazhe ishte edhe kryetarja e Kuvendit, Albulena Haxhiu, e cila tha se këto masakra janë pjesë e historisë që nuk do të harrohen kurrë.
“Po zotohemi që do të angazhohemi me përgjegjësinë më të lartë që t’i nderojmë të mbijetuarit e dhunës, të qëndrojmë pranë familjarëve dhe ta kujtojmë çdo herë me krenari historinë e Republikës së Kosovës, por edhe krimet që Serbia i ka bërë në Kosovë, që nuk do t’i harrojë kurrë populli i Kosovës”, u shpreh kryeparlamentarja Haxhiu.
Mesazhi për kujtesë dhe drejtësi u përsërit edhe nga zëvendëskryeministri i parë, Glauk Konjufca.
“Ne kurrë nuk do të harrojmë, gjithmonë do të jemi këtu për ta treguar të vërtetën. Këto tri familje e kanë dëshmuar tmerrin e këtyre masakrave, por ne mendojmë që më së miri u dalim zot kujtesës duke punuar në mënyrë të ndershme për vendin tonë, duke përfaqësuar shtetin tonë me dinjitet”, deklaroi Konjufca.
Edhe i pari i komunës së Podujevës, Shpejtim Bulliqi, theksoi obligimin për të nderuar të rënët.
“Ne kemi obligim që t’i respektojmë, t’i nderojmë gjithherë, sepse falë gjakut të tyre jemi këtu ku jemi sot, po ndërtojmë një shtet të ri, një shtet i cili po presim të mira të gjithë nga zhvillimet e mbarë të këtyre institucioneve tona këtu në Kosovë. Prandaj, lavdi dëshmorëve, lavdi gjithë martirëve dhe të gjithë atyre të cilët dhanë jetën për lirinë e Kosovës”, tha Bulliqi.
Në Podujevë, 27 vjet më parë, paramilitarët serbë masakruan 14 shqiptarë civilë në familjen Bogujevci dhe Duriqi.
