Deputetja e Partisë Demokratike të Kosovës, Ganimete Musliu, ka deklaruar se ky subjekt politik nuk do të kontestojë vendimin e Gjykatës Kushtetuese, i cili sipas saj ka qenë i pritshëm dhe i ditur.
Musliu ka shtuar se vendi është futur në një udhëkryq të panevojshëm për shkaqe personale dhe inate politike, jo për krizë serioze.
“PDK-ja asnjëherë nuk i ka kontestuar vendimet e Gjykatës Kushtetuese dhe nuk e kontestojmë as këtë vendim. Nuk kishte nevojë të humbnim kaq shumë kohë për një vendim që ishte thuajse i qartë. Vendi ynë është në një udhëkryq të panevojshëm për shkaqe personale dhe politike”, ka thënë ajo në emisionin “Info Nata” në Tëvë1.
Sipas saj, me vendimin e sotëm të Kushtetueses, përgjegjësia kryesore bie mbi kryeministrin, Albin Kurti.
Musliu ka theksuar se deputetët kanë afat 34 ditë për të përmbushur procesin, por gjithçka varet nga gatishmëria e Kurtit për ta zgjidhur ngërçin që, sipas saj, ka shkaktuar vetë.
“Nëse ai ka gatishmëri ta zgjidhë ngërçin që ka shkaktuar vetë, është në dorën e tij. Por nëse sillet si më parë, ne do të mbetemi duke numëruar në vend dhe pas 665 ditëve do të shkojmë në zgjedhje të reja”, ka shtuar ajo.
Sa i përket mundësisë së zgjedhjeve të reja, Musliu ka thënë se PDK-ja nuk ka qenë e interesuar për to, duke vënë në dukje nevojat e vendit dhe situatën ekonomike, por është e gatshme të garojë nëse ato organizohen.
“PDK-ja nuk ka qenë e interesuar për zgjedhje, duke pasur parasysh nevojat e vendit dhe situatën e rënduar ekonomike. Megjithatë, ne nuk i frikësohemi zgjedhjeve dhe jemi të gatshëm të dalim dhe të garojmë me potencial të plotë. Nëse shkohet në zgjedhje, PDK-ja hyn për të fituar, dhe pastaj është në dorën e qytetarit të vendosë se kë e voton. Unë ia heq kapelën votës së qytetarit”, ka përfunduar Musliu.
