Kryetari i Drenasit, Ramiz Lladrovci, ka reaguar lidhur me situatën brenda Partisë Demokratike të Kosovës, duke i drejtuar një mesazh të hapur kryetarit të partisë, Bedri Hamzës. Ai ka theksuar nevojën për ndryshime në strukturat dhe vendimmarrjen e PDK-së për të arritur rezultate më të mira në zgjedhjet e ardhshme.
“Disa nga shkaqet për ta ndryshuar veprimin për rezultat ndryshe, z. Hamza i ka në dorë ta bëj ndryshimin. Normalisht, duke filluar të heq të ricikluarit e përjetshëm nga skema e të pazëvendësueshmëve, të largojë nga vendimmarrja konformistët, oportunistët dhe bjerrakohësit partiakë,” ka shkruar Lladrovci.
Ai paralajmëroi se nëse nuk ndërmerren këto ndryshime, Hamza mund të rrezikojë lidershipin e partisë:
“Është i rrezikuar në dy mënyra, ose për ta larguar nga lidershipi e ta zëvendësojnë, ose e lejojnë të prijë, por, do ta sabotojnë sërish në fushatë për ta sjellë në nivel edhe më të ulët të votave.”
Lladrovci shtoi se rezultatet e deritanishme të PDK-së tregojnë mangësi të qarta:
“Paralajmërimet e mia se nëse z. Hamza nuk bëhen ndryshime në struktura të partisë për zgjedhjet e 28 dhjetorit, do t’ia bëjnë gropën dhe PDK do të ketë rezultat më të dobët. Ashtu doli, dy deputetë më pak, nga 24 në 22.”
Ai theksoi se veprimet e lidershipit janë vendimtare për të siguruar një PDK më të fortë dhe të aftë për t’iu përgjigjur nevojave të qytetarëve dhe shtetit:
“Prandaj, për rezultate më të mira të PDK-së, kërkohen veprime më të mira. Nëse z. Hamza nuk vepron, qofsha i gabuar, por kam informata se do të veprojnë ata që janë të kënaqur me veten dhe me partinë,” tha Lladrovci.
Gjithashtu, ai komentoi edhe çështjen e Gjykatës Kushtetuese, duke thënë se kjo nuk do të përmirësojë gjendjen e partisë dhe të vendit:
“Gjykata Kushtetuese pres t’i japë nga pak të drejtë të dy palëve, edhe Presidentes, edhe Kryeministrit… Kjo çështje nuk e përmirëson gjendjen e PDK-së dhe të Kosovës, gjendje të cilat nuk vlerësoj si të mira dhe qytetarët presin më shumë nga të gjithë ne. PDK nuk guxon të ndalet!”
Lladrovci përfundoi mesazhin duke nënvizuar rëndësinë e një lidershipi të vendosur dhe të përgjegjshëm për të siguruar rezultate më të mira dhe stabilitet në partinë historike të shtetndërtimit.
