Kryeministri i Kosovës, Albin Kurti, ka pritur në takim ambasadorin e Zvicrës në Kosovë, Jürg Sprecher, me të cilin ka diskutuar për marrëdhëniet dypalëshe dhe mundësitë e zgjerimit të bashkëpunimit.
Gjatë takimit, Kurti ka theksuar se Zvicra mbetet një nga partnerët më të çmuar të Kosovës, duke nënvizuar se marrëdhëniet ndërmjet dy vendeve janë të ndërtuara mbi vlera të përbashkëta si sundimi i ligjit, qeverisja demokratike dhe zhvillimi i qëndrueshëm.
“Jemi të interesuar që në mandatin e ri të thellojmë bashkëpunimin me Zvicrën”, ka deklaruar Kurti, duke falënderuar për mbështetjen e vazhdueshme përmes KFOR dhe Agjencia Zvicerane për Zhvillim dhe Bashkëpunim.
Sipas njoftimit të ZKM-së në kuadër të programit katërvjeçar të SDC-së, Zvicra ka zotuar për Kosovën një total prej 86 milionë eurosh, ndërsa për periudhën 2026–2029 janë planifikuar edhe mbi 64 milionë euro shtesë.
Nga ana tjetër, ambasadori Sprecher ka uruar Kurtin për mandatin e ri, duke theksuar se Zvicra do të vazhdojë të punojë ngushtë me institucionet demokratike të Kosovës.
Në takim është diskutuar edhe për rolin e mërgatës kosovare në Zvicër si urë lidhëse ndërmjet dy shteteve, si dhe për Marrëveshjen për Tregti të Lirë me EFTA, e nënshkruar në Davos, e cila ende pret ratifikimin në Kuvendin e Kosovës.
Zvicra mbetet një nga partnerët kryesorë ekonomikë të Kosovës, duke qenë burimi i dytë më i madh i investimeve të huaja direkte, ndërsa një pjesë e konsiderueshme e remitencave vjen nga diaspora në këtë shtet.
