Kolonët e paligjshëm izraelitë kryen sulme të koordinuara në 13 vende të Bregut Perëndimor gjatë dy ditëve të fundit, duke plagosur palestinezë dhe shkaktuar dëme të mëdha materiale, sipas zyrtarëve dhe dëshmitarëve palestinezë.
Agjencia palestineze Wafa raportoi se sulmet filluan të shtunën vonë, duke vënë zjarrin shtëpive dhe automjeteve dhe duke hedhur gurë ndaj makinave palestineze.
Sulmi më i rëndë ishte në fshatin al-Funduq pranë Jenin, ku kolonët dogjën shtëpi dhe automjete, ndërsa banorët u përpoqën të shuanin zjarret, tha Wafa, citon Anadolu.
Në Luginën veriore të Jordanit, kolonët spërkatën palestinezët me sprej me piper në Ein al-Hilweh dhe hodhën gurë ndaj automjeteve në rrugë si Rruga Ramallah-Nablus, pranë Za’atara, Burin, Haris dhe Tuqu.
Të dielën, tre palestinezë u plagosën në Jalud, ku u dogjën katër automjete dhe ndërtesa e këshillit të fshatit, sipas Gjysmëhënës së Kuqe Palestineze. Në Bruqin, tre të tjerë u plagosën nga gurë në automjetin e tyre, tha Wafa.
Kolonët sulmuan edhe Deir Sharaf dhe Deir al-Hatab, duke djegur automjete dhe prona. Në Deir al-Hatab, 10 persona u plagosën nga armë zjarri, rrahje, tym dhe gura, tha Gjysmëhëna e Kuqe.
Të hënën, kolonët bastisën një shkollë në Hawara, hoqën flamurin palestinez, ngritën atë izraelit dhe shkruan slogane raciste në hebraisht. Ministria e Arsimit tha se incidenti përbënte një “shkelje të shenjtërisë së institucioneve arsimore dhe një sulm ndaj një mjedisi të sigurt mësimor.”
Në shkurt, kolonët kryen 511 sulme në Bregun Perëndimor, duke vrarë shtatë palestinezë, sipas shifrave zyrtare.
Që nga fillimi i luftës në Gaza më 8 tetor 2023, sulmet izraelite dhe të kolonëve kanë vrarë 1,133 palestinezë, plagosur rreth 11,700 dhe arrestuar rreth 22,000.
Në korrik 2024, Gjykata Ndërkombëtare e Drejtësisë shpalli të paligjshëm pushtimin e territorit palestinez dhe bëri thirrje për evakuimin e të gjitha vendbanimeve në Bregun Perëndimor dhe Jerusalemin Lindor./teve1.info/
