Prokuroria Themelore në Prizren ka kërkuar caktimin e paraburgimit për dy persona, M.A. dhe B.A., të arrestuar nën dyshimin për kultivim dhe përpunim të narkotikëve në fshatin Maqitevë të Suharekës.
Sipas Prokurorisë, të dyshuarit dyshohet se kanë vepruar në bashkëkryerje me një person tjetër, me qëllim të kultivimit të kanabisit dhe përgatitjes së narkotikëve për shitje dhe shpërndarje.
Prokuroria ka bërë të ditur se hetimet për këtë rast kanë vazhduar pas aksionit të shtatorit 2025, kur u sekuestruan mbi gjysmë ton marihuanë dhe armë të ndryshme.
“Prokuroria Themelore në Prizren, vazhdon të mbetet e përkushtuar në luftën ndaj kriminalitetit, forcimin e sundimit të ligjit dhe vënien para drejtësisë të të gjithë atyre që bien ndesh me ligjin”, thuhet në njoftimin e Prokurorisë.
Më 16 shtator 2025, gjatë një aksioni në një shtallë në zonën malore të Maqitevës, autoritetet sekuestruan mbi gjysmë ton marihuanë, armë, municion, pajisje për kultivim dhe përpunim, si dhe një traktor me rimorkio. Në tetor 2026, gjatë kontrolleve në shtëpitë e dy të dyshuarve, u sekuestruan edhe dy pushkë./teve1.info/
