Grupi për Studime Juridike dhe Politike (GLPS) ka kërkuar që Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme të mos votohet në lexim të dytë në Kuvendin e Kosovës, por të kthehet edhe një herë në Komisionin për Legjislacion.
Në një konferencë për media, përfaqësuesit e GLPS-së, Blerina Istrefi dhe Liridon Salihu, kanë shprehur shqetësime lidhur me procedurën parlamentare dhe përmbajtjen e projektligjit, i cili pritet të shqyrtohet të enjten në lexim të dytë.
Salihu ka theksuar se projektligji aktual nuk i ka adresuar gjetjet e Gjykatës Kushtetuese dhe se, sipas GLPS-së, nuk ka ndryshime thelbësore në përmbajtje krahasuar me projektligjin që ishte rrëzuar nga kjo gjykatë në vitin 2023.
“Pra, fillimisht procedura mes dy leximeve ka qenë më shumë një formalitet se sa një shqyrtim në detaje i dispozitave të këtij projektligji. Kjo ka qenë në fazën mes dy leximeve, ndërsa në përmbajtjen që ka aktualisht projektligji, siç e kemi theksuar edhe pasi që është votuar në lexim të parë, ne vlerësojmë që ky projektligj përmban të gjitha ato dispozita për të cilat Gjykata Kushtetuese në vitin 2023 e ka rrëzuar këtë projektligj. Pra, nuk ka ndonjë ndryshim substancial sa i përket përmbajtjes në raport me atë që është rrëzuar nga Gjykata Kushtetuese”, ka deklaruar Salihu.
Ai ka theksuar se GLPS-ja ka identifikuar disa çështje shqetësuese në përmbajtjen e projektligjit, përfshirë afatin retroaktiv, pavarësinë funksionale të Byrosë, sigurinë juridike të qytetarëve, aspektin penal dhe barazinë e palëve në procedurë.
Sipas Salihut, një nga problemet kryesore është përfshirja e datës 17 shkurt 2008 si pikënisje për verifikimin e pasurisë, ndonëse Gjykata Kushtetuese, sipas tij, ka kërkuar që afati të mos tejkalojë dhjetë vjet.
“Prandaj, kemi kërkuar që ky afat të hiqet dhe të respektohet në përpikëri afati i cili është sugjeruar dhe është rekomanduar edhe nga Gjykata Kushtetuese, pra jo afat më i gjatë se sa 10 vite nga hyrja në fuqi e këtij ligji”, ka thënë Salihu.
Një tjetër shqetësim, sipas tij, lidhet me pavarësinë funksionale të Byrosë dhe mundësinë që ajo të përdoret si mjet politik.
Në fund, GLPS-ja i ka bërë thirrje Kuvendit që projektligji të mos miratohet në lexim të dytë dhe të kthehet për shqyrtim të mëtejshëm në Komisionin për Legjislacion.
“Prandaj, ne i bëjmë thirrje Kuvendit të Kosovës që të enjten, kur edhe është caktuar në rend të ditës miratimi në lexim të dytë i këtij projektligji, ky projektligj të mos… të mos votohet në lexim të dytë. Pra, të kthehet edhe një herë në Komision për Legjislacion dhe të sqarohen të gjitha këto çështje që janë kontestuese dhe që e cenohen sigurinë juridike të qytetarëve”, ka deklaruar Salihu.
Ai ka shtuar se GLPS-ja u ka bërë thirrje palëve të autorizuara që, nëse projektligji miratohet me përmbajtjen aktuale, ta kontestojnë sërish në Gjykatën Kushtetuese.
