Ish-koordinatori nacional për reforma në Administratën Publike, Besnik Tahri ka kritikuar vendimin e Qeverisë për themelimin e Këshillit të Ministrave për Reformën e Administratës Publike.
Tahiri që tani është deputet i AAK-së, ka thënë sy ke vendim është në kundërshtim me parimet e llogaridhënies dhe përgjegjësisë.
Sipas tij reforma në administratë duhet të bëhet nga ministria përkatëse.
Vendimi i Qeverisë për themelimin e Këshillit të Ministrave për Reformën e Administratës Publike është një devijim i plotë nga parimet bazë të llogaridhënies dhe përgjegjësisë institucionale për reforma në administratë të shtetit.
“Reforma e Administratës Publike ka adresë të qartë, ajo është tek ministria përkatëse dhe përgjegjëse, rishatazi e themeluar: Ministrinë e Digjitalizimit dhe Administratës Publike. Pikërisht aty duhet të qëndrojë përgjegjësia, udhëheqja dhe zbatimi i saj. Themelimi i një Këshilli të ri ministror për këtë qëllim është i panevojshëm, kur dihet se vetë Kabineti Qeveritar tashmë ekziston si organ kolegjial vendimmarrës. Sugjerimi ynë është forcimi i rolit të kësaj ministrie, e cila me të drejtë është rithmeluar dhe është përshëndetur si hap pozitiv. Mirëpo, me këtë vendim po i zbehet dhe po i shpërndahet përgjegjësia”, ka shkruar Tahiri në Facebook.
Ndërsa, Qeveria ka thënë se funksioni dhe përbërja e Këshillit të Ministrave të Reformës së Administratës Publike, do të jetë struktura kryesore përgjegjëse për sigurimin e zbatimit të dokumenteve strategjike të Reformës së Administratës Publike.
Ky këshill do këtë përbërje: Ministri i Ministrisë së Digjitalizimit dhe Administratës Publike, kryesues; Ministri i Ministrisë së Financave, anëtar; Ministri i Ministrisë së Administrimit të Pushtetit Lokal, anëtar; Ministrja e Ministrisë së Industrisë, Ndërmarrësisë, Tregtisë dhe Inovacionit, anëtare; Ministrja e Ministrisë së Drejtësisë, anëtare; dhe Përfaqësues nga Zyra e Kryeministrit, anëtar./teve1.info/
