Ministri për Punë, Familje dhe Vlerat e Luftës Çlirimtare, Andin Hoti, ka reaguar lidhur me rastin e rëndë të një 5-vjeçari në Lipjan, i cili dyshohet se është keqtrajtuar nga prindërit e tij.
Hoti bëri të ditur se ndërhyrjet direkte në raste të tilla janë përgjegjësi e komunave, përkatësisht e Qendrave për Punë Sociale, ndërsa roli i Ministrisë mbetet në nivel të politikave dhe mbikëqyrjes.
“Ne përgjegjësisë nuk mund t’i ikim në këtë pikë. Megjithatë ne duhemi me ditë se të gjitha rastet sociale në Republikën e Kosovës që përfshijnë trajtimin e dhunës, keqtrajtimin dhe çdo lloj tjetër forme që kërkon dhe është e nevojshme ndërhyrja e institucioneve, është kompetencë e komunave, përkatësisht e Qendrave për Punë Sociale, dhe jo e Ministrisë që e udhëheq unë”, ka deklaruar Hoti në konferencën pas mbledhjes së Qeverisë.
Ai shtoi se Ministria ka ndërmarrë hapa konkretë duke aktivizuar njësinë e inspektimit, e cila tashmë ka nisur hetimet urgjente në Qendrën për Punë Sociale në Lipjan.
Ndërkohë, Gjykata Themelore në Prishtinë ka caktuar nga një muaj paraburgim për prindërit e fëmijës, A.K. dhe V.P., të cilët dyshohen për veprat penale “Shkelje e detyrimeve familjare” dhe “Lëndim i rëndë trupor”.
Fëmija është duke u trajtuar në Qendrën Klinike Universitare të Kosovës, pasi është pranuar fillimisht në Emergjencën Qendrore me plagë të rënda në të dy shputat e këmbëve, të shoqëruara me ndryshime gangrenoze. Gjendja e tij në momentin e pranimit ishte e rëndë, me dyshime për kequshqyerje dhe vështirësi në komunikim./teve1.info/
