Faqja zyrtare e ligës së futbollit italian Serie A, i ka kushtuar një dokumentar mesfushorit të Kombëtares shqiptare, Ylber Ramadani, ku ai rrëfen rrugëtimin e tij futbollistik dhe përvojat në vende të ndryshme para se të gjente stabilitet te Lecce.
Karriera e Ramadanit është karakterizuar nga lëvizje në kultura dhe kampionate të ndryshme. Mesfushori është shndërruar në një lojtar të rëndësishëm për skuadrën e drejtuar nga Eusebio Di Francesco, duke qenë një pikë referimi në betejën e Lecces për mbijetesë në elitën e futbollit italian.
Përvojat në vende të ndryshme
Në dokumentar, Ramadani tregon se eksperiencat në kampionate të ndryshme e kanë ndihmuar të rritet si lojtar dhe si person.
“Kam udhëtuar përreth botës dhe kam mësuar shumë rreth kulturave të ndryshme. Ka shumë ndryshime nga një vend në tjetrin. Në Danimarkë bënte ftohtë, edhe në Skoci po ashtu. Tani luaj te Lecce dhe është sikur jam në shtëpi: ka plazh, diell dhe gjithçka,” shprehet ai.
Presioni i mbijetesës në Serinë A
Mesfushori shqiptar thekson se lufta për të shmangur rënien nga kategoria është një nga sfidat më të vështira në futboll.
“Jam rritur shumë si lojtar. Të luftosh për të shmangur rënien nga kategoria nuk është e lehtë. Presioni rritet kur ndeshjet nuk shkojnë sipas dëshirës, sepse tifozët duan që skuadra të qëndroj në Serie A. Jam shumë i lumtur këtu, sepse kam mësuar shumë,” deklaron Ramadani.
Fillimet e vështira dhe roli i familjes
Ramadani rrëfen se rruga drejt futbollit profesionist nuk ka qenë e lehtë. Në fillim, babai i tij ishte skeptik për karrierën e tij.
“Në fillim babai nuk më linte të luaja futboll, sepse mendonte se nuk do t’ia dilja. Më pas erdhi të më shihte duke luajtur dhe kuptoi se isha i destinuar të bëhesha futbollist. Gjithmonë e falënderoj, sepse më pas u bë krahu im i djathtë,” tregon ai.
Mungesa e Medon Berishës
Mesfushori i Lecces ka folur edhe për mungesën e bashkëlojtarit të tij shqiptar, Medon Berisha, duke vlerësuar cilësitë e tij në fushë.
“Berisha mund ta mbajë veten në Serinë A. Goditjet, fuqia dhe cilësia e tij i kanë pak lojtarë në këtë kampionat. Ai krijon shumë raste dhe jep asistime. Ne e ndiejmë shumë mungesën e tij,” tha Ramadani.
Mbështetja e tifozëve
Tifozët e Lecces kanë krijuar edhe një këngë të veçantë për dy futbollistët shqiptarë të skuadrës, gjë që sipas Ramadanit është një motivim i madh.
“Më pëlqen shumë kjo gjë, sepse shoh pasionin e tifozëve. Dua t’ua shpërblej besimin duke shmangur rënien nga kategoria,” thekson ai.
Statistikat e sezonit dhe e ardhmja
Gjatë këtij sezoni në Serinë A, Ramadani ka luajtur 27 nga 28 ndeshjet e mundshme, duke qenë një titullar i padiskutueshëm në mesfushë. Deri tani ai ka shënuar një gol, ndërsa kontributi i tij në lojë vlerësohet i rëndësishëm për skuadrën.
Mesfushori shqiptar është pjesë e Lecces prej tre vitesh. Kontrata e tij përfundon këtë verë, por klubi pritet të aktivizojë një klauzolë që e rinovon automatikisht marrëveshjen edhe për një vit tjetër.
