Marash Kumbulla nuk po kalon një situatë të lumtur në këtë edicion në Spanjë. Futbollisti i Kombëtares shqiptare të futbollit, pas një starti të mirë me Majorkën, ka pësuar një rënie të ndjeshme si pasojë edhe e dëmtimeve të njëpasnjëshme që nuk e kanë lënë të qetë.
Kësisoj, ai nuk është aktivizuar rregullisht dhe fakti që situata po përsëritet në vazhdimësi, ka shtyrë futbollistin që të kërkojë një ndryshim drastik. Mediat spanjolle bëjnë të ditur se mbrojtësi i ka kërkuar leje Majorkës që të largohet për disa ditë për t’u kthyer në Itali pranë familjes së tij. Ai ka argumentuar se të gjitha këto dëmtime që po përsëriten, e kanë rënduar psikologjikisht dhe ka nevojë që të qetësohet paksa larg terreneve të futbollit.
Klubi ka pranuar, duke ndjekur të njëjtën rrugë që zgjodhi edhe Barcelona me kapitenin Ronald Arauho, Edhe ky i fundit, në ditët e para të vitit u shkëput nga ekipi pas disa paraqitjeve të dobëta, për të qenë i qetë në kërkim të rikuperimit të gjendjes më të mirë fizike dhe psikologjike, për t’u kthyer tashmë i gatshëm për katalanasit.
