Një ditë më parë, dekreti i presidentes Osmani u ndal përkohësisht.
Me po të njëjtin konkluzion të Kushtetueses, as Kuvendi nuk mundet të operojë.
Kjo masë e përkohshme, me vendim të Gjykatës, mbetet në fuqi deri më 31 mars.
“Gjykata thekson se vendosja e masës së përkohshme ex officio dhe sipas kërkesës së parashtruesit të kërkesës përmes të cilës ndalohet ndërmarrja e çdo veprimi nga Presidentja lidhur me Dekretin [nr. 24/2026] të 6 marsit 2026 si dhe ndalimit të çdo veprimi të Kuvendit deri në vendosjen e rastit nga Gjykata Kushtetuese është në funksion të parandalimit të shkaktimit të dëmit të pariparueshëm për rendin kushtetues të Republikës së Kosovës dhe funksionimin demokratik të institucioneve kyçe në Republikën e Kosovës”, thuhet në njoftimin e Gjykatës Kushtetuese.
Përmes vendosjes së masës së përkohshme vlerësohet se të gjitha palët do të përfitojnë kohë, derisa të vendoset nëse dekreti për shpërbërje të Kuvendit ka qenë apo jo në përputhje me aktin më të lartë juridik.
“Masa e përkohshme lë që të fitojnë kohë të gjitha palët dhe që në fakt edhe Gjykata Kushtetuese të mos ndihet në trysni lidhur me vendimmarrjen e vet. Pra, çka nënkupton efektivisht dhe praktikisht kjo masë e përkohshme është që vendimi i Osmanit, dekreti i saj, tashmë nuk prodhon efekt juridik, por kjo nuk do të thotë se është anuluar. Thjesht, kur të kalon afati i masës së përkohshme, atëherë do të vlerësohet nga ana e Gjykatës se dekreti i Osmanit, a ka qenë në pajtim me Kushtetutën apo jo”, u shpreh Kabashi.
Deri në ditën e fundit të këtij muaji, është ndaluar edhe çdo veprim nga ana e legjislativit.
E pikërisht mes këtyre dy pikave, kërkohet që të kihet kujdes.
“Mendoj se duhet të ketë kujdes edhe Kuvendi me veprimet me të cilat mund ta afektojnë njërin pushtet karshi tjetrit, sepse tash i kemi dy palë ndërgjygjëse në Gjykatën Kushtetuese. Në njërën anë është presidentja dhe në anën tjetër është Kuvendi, dhe veprimet e këtyre dyjave afektojnë njëra tjetrën”, ka thënë tutje Kabashi.
Masa e përkohshme përfundon katër ditë para se të përfundojë mandati i Vjosa Osmanit si presidente e vendit.
