Katër zyrtarë policorë kanë pësuar lëndime gjatë arrestimit të një 45-vjeçari në fshatin Samadraxhë të Suharekës.
Sipas Policisë së Kosovës, rasti ka ndodhur më 10 mars 2026, rreth orës 08:30, pasi policia ka pranuar një ankesë nga një qytetar se i dyshuari me inicialet B.K., 45 vjeçar nga Samadraxha, kishte bllokuar rrugën “Ramush Kotori” në këtë fshat.
Ai dyshohet se kishte vendosur shufra metalike të ngulitura në tokë dhe të lidhura me tel, duke penguar qarkullimin e lirë të banorëve në atë zonë.
Menjëherë pas raportimit, patrullat policore kanë dalë në vendin e ngjarjes. Gjatë ndërhyrjes, i dyshuari ka sulmuar zyrtarët policorë me armë të ftohtë, përkatësisht me thikë.
Policia ka reaguar menjëherë duke neutralizuar sulmin dhe duke arritur ta arrestojë të dyshuarin. Gjatë procesit të arrestimit, për shkak të kundërshtimit të dhunshëm nga ana e tij, katër policë kanë pësuar lëndime të lehta trupore, por jo nga thika.
I dyshuari është dërguar në Stacionin Policor në Suharekë, ndërsa në konsultim me Prokurorin e Shtetit pritet të ndërmerren veprimet e mëtejshme procedurale në përputhje me Kodin Penal dhe Kodin e Procedurës Penale të Republikës së Kosovës.
