Presidentja e Kosovës, Vjosa Osmani, ka nxjerrë dekretin për shpërndarjen e Kuvendi i Kosovës, duke e çuar vendin drejt zgjedhjeve të reja.
Në një konferencë për media, Osmani tha se vendimi erdhi pas dështimit të deputetëve të enjten mbrëma për të zgjedhur presidentin e vendit.
Sipas saj, fakti që Kuvendi nuk i ka shfrytëzuar ditët që kishte në dispozicion për ta përmbyllur procesin, nuk e ndryshon Kushtetutën.
“Fakti që Kuvendi ka zgjedhur të mos i shfrytëzojë ditët që i kishte në dispozicion, nuk e ndryshon Kushtetutën tonë. Asnjë kërkesë për masë të përkohshme në Gjykatën Kushtetuese nuk e pezullon automatikisht rrjedhjen e afatit kushtetues. Vetëm një vendim i Gjykatës do të mund ta bënte një gjë të tillë dhe një vendim i tillë nuk ekziston deri në këto momente. Kemi një situatë ku afati kushtetues tashmë ka përfunduar”, tha Osmani.
Ajo theksoi se situata aktuale është krijuar nga veprime të papërgjegjshme politike.
“Këtu e sollën vendin njerëz të papërgjegjshëm e me qëllime të rrezikshme. Alternativa, pra zvarritjet, do të krijonin situata shumë më të rrezikshme: paqartësi kushtetuese, një proces të zvarritur pafund, siç e kemi parë edhe vitin e kaluar dhe një shtet që tenton ta relativizojë edhe vetë Kushtetutën e tij”, u shpreh presidentja.
Në fund, Osmani tha se vendimi për shpërndarjen e Kuvendit është një detyrim kushtetues dhe se fjala e fundit i takon qytetarëve.
“Shteti mbahet në këmbë nga një parim i vetëm: ligji dhe Kushtetuta mbi të gjithë. Sot po përmbush një detyrim të qartë kushtetues dhe po ua rikthej fjalën atyre që në demokraci e kanë fjalën e fundit – qytetarëve të Republikës”, përfundoi ajo.
