Mjafton të bësh një pyetje për të marrë përgjigje brenda pak sekondash.
ChatGPT një mjet i inteligjencës artificiale tashmë është bërë pjesë e përditshmërisë së njerëzve.
E një numër i madh i fëmijëve po e përdorin atë për të gjetur informata të ndryshme.
Një hulumtim i bërë nga organizata Common Sense Media në SHBA tregon se 70 për qind e adoleshentëve e përdorin inteligjencën artificiale për punët e shkollës.
Por, përveç lehtësive, përdorimi i saj po sjell edhe rreziqe.
“Inteligjenca artificiale e ka lehtësuar shumë punën… duhet pasur parasysh që inteligjenca artificiale sjell rreziqe jashtëzakonisht të mëdha gjatë përdorimit. Për shembull, mund të ekspozohen të dhëna që janë komplet private dhe sistemet e inteligjencës artificiale juve iu premtojnë që ato të dhëna nuk do të ekspozohen, por në fakt ato megjithatë mund të rrjedhin, qoftë nga vetë sistemet e inteligjencës artificiale, të cilat i trajnojnë versionet e reja me ato të dhëna që juve i keni ndarë, qoftë përmes palëve të treta të cilët mund t’i ekspozojnë domethënë këto informacione private”, thotw Driart Elshani-ekspert i kibernetikës.
E njohësi i arsimit thotë që kjo mund të ndikojë edhe në zhvillimin e mendjes te fëmijët.
“Inteligjenca artificiale ka mundësuar shumë sot qasjen në informata, pastaj përgatitjet të të shkrimeve e të tjerë e të tjerë, po ajo ana e rrezikshme është që po i pasivizon nxënësit shumë, fëmijët, jo vetëm nxënësit por edhe të rriturit, për shkak se po i marrin gjërat të gatshme. Kështu që nëse i marrin gjërat të gatshme, ne do të mbetemi shumë zbrazësi në njohuritë tona. Po të shfrytëzohet kjo për përfitimin e njohurive të reja, për zhvillimin e shkathtësive komunikuese e të tjerë, kjo është diçka shumë pozitive”, thotë Ismet Potera..
Ndërkaq mbikëqyrja nga prindërit është e domosdoshme, kështu e thotë psikologja, Mirjeta Pestisha.
“Në fakt jo vetëm të përdorimit të inteligjencës artificiale, prindërit dhe kujdestarët duhet të jenë gjithmonë në kontrollin qoftë edhe të aplikacioneve të tjera, se ne e dimë rrezikshmëria nuk është vetëm prej vetëm prej ChatGPT-së, mirëpo rrezikshmëri të madhe kemi Fëmijët, po flas ndoshta po e me thënë deri në moshën 16-vjeçare, duhet të jenë thjesht të fokusuar dhe që prindërit duhet të jenë të fokusuar dhe duhet të jenë mbikëqyrës në atë se me çfarë fëmijët e tyre ekspozohen, qoftë në rrjetet sociale, qoftë në ato të cilat i pyesin ChatGPT-së”, shprehet ajo.
Ndryshe, organizata “Common Sense Media” përdori më shumë se 4,000 kërkesa gjatë testimit në SHBA, ndërsa përgjigjet u analizuan nga psikiatër për fëmijë dhe një pediatër.
