Deputetja e AAK-së, Time Kadrijaj, në seancën solemne të Kuvendit të Kosovës për shënimin e Epopeja e UÇK-së, kujtoi sakrificën e familjes Jashari në Prekaz.
Nga foltorja e Kuvendit, ajo theksoi se kjo ngjarje përfaqëson një nga kapitujt më të lavdishëm dhe njëkohësisht më të dhimbshëm të historisë kombëtare, duke vënë në pah qëndresën e familjes së komandantit legjendar Adem Jashari.
Kadrijaj tha se historia njeh familje që shkruajnë histori, por edhe familje që bëhen vetë histori, duke theksuar se familja Jashari është një shembull i tillë.
Sipas saj, në mars të vitit 1998 në Prekaz u zhvillua një përballje mes frikës dhe lirisë, mes nënshtrimit dhe dinjitetit. Ajo rikujtoi se për tri ditë radhazi, më 5, 6 dhe 7 mars, familja Jashari qëndroi e palëkundur përballë një force të madhe ushtarake.
Deputetja theksoi se anëtarët e kësaj familjeje e dinin rrezikun dhe çmimin e lartë që mund të paguanin, por besonin se liria kërkon sakrifica të mëdha.
Ajo shtoi se 59 anëtarë të familjes Jashari, burra, gra dhe fëmijë, u flijuan gjatë asaj beteje, duke mos u tërhequr dhe duke mos u përkulur. Sipas saj, në kullën e Prekaz u mbrojt nderi i një kombi dhe e drejta për të jetuar të lirë në tokën e vet.
“Sot përkujtojmë me respekt dhe me përulësi një prej kapitujve më të lavdishëm dhe më të dhimbshëm të historisë sonë kombëtare, sakrificën e familjes Jashari. Ka familje që bëjnë histori, por ka familje që bëhen vetë histori, e tillë është familja e komandantit legjendar Adem Jashari. Në marsin e vitit 1998 në Prekaz u zhvillua një betejë mes frikës dhe lirisë, mes nënshtrimit dhe dinjitetit. Për tri ditë me radhë, më 5, 6 dhe 7 mars, familja Jashari qëndroi e pathyeshme përballë një makinerie të tërë ushtarake. Ata e dinin se çmimi ishte i lartë, e dinin se rreziku ishte i madh, por mbi të gjitha e dinin se liria kërkon këto sakrifica. 59 anëtarë të kësaj familjeje u flijuan, burra, gra e fëmijë. Ata nuk u tërhoqën, nuk u përkulën. Nën atë kullë të Prekazit u mbrojt nderi i një kombi dhe e drejta për të jetuar të lirë në tokën tonë”, tha Kadrijaj./teve1.info/
