Presidenti i Shteteve të Bashkuara, Donald Trump, ka mbajtur fjalimin më të gjatë për Gjendjen e Kombit në historinë moderne amerikane – plot 108 minuta – duke e cilësuar këtë periudhë si “epokën e artë të Amerikës”.
Mes brohoritjeve “SHBA! SHBA!” në sallën e Kongresit, presidenti u prezantua nga Kryetari i Dhomës së Përfaqësuesve, Mike Johnson.
Në nisje të fjalimit, Trump deklaroi se Amerika është rikthyer më e fortë se kurrë.
“Ju nuk keni parë asgjë ende. Ne do të bëjmë gjithnjë e më mirë dhe më mirë. Kjo është epoka e artë e Amerikës”, tha Trump.
Presidenti amerikan këmbënguli se ai ka arritur të nxisë një bum ekonomik dhe ka imponuar një rend të ri botëror jashtë vendit.
Ai mbrojti gjithashtu masat e ashpra kundër emigracionit dhe tarifat tregtare, disa prej të cilave janë rrëzuar së fundmi nga Gjykata Supreme.
Trump u bëri thirrje ligjvënësve të ngrihen në këmbë nëse bien dakord që, sipas tij, detyra e parë e qeverisë amerikane është mbrojtja e qytetarëve amerikanë, jo emigrantëve të paligjshëm.
Republikanët reaguan me ovacione të gjata, ndërsa demokratët qëndruan kryesisht të ulur – një reagim që presidenti e kritikoi hapur.
Në politikën e jashtme, Trump deklaroi se administrata e tij po i jep fund konflikteve në botë por pastaj përmendi me mburrje operacionin amerikan për shkatërrimin e centraleve bërthamore të Iranit vitin e kaluar.
Fjalimi vjen në një moment tensioni në Lindjen e Mesme, ku dy aeroplanmbajtëse amerikane janë dërguar për shkak të përshkallëzimit me Iranin.
Trump tha se preferon qw t’i zgjidh problemet me Iranin përmes diplomacisë, por nuk do tw lejojw qw ai tw ketë njw armw bërthamore.
“Por një gjë është e sigurt, unë kurrë nuk do të lejoj që sponsori numër një i terrorizmit në botë, të cilët janë padyshim, të ketë një armë bërthamore. Nuk mund ta lejoj që kjo të ndodhë”, tha Trump.
Nga ana tjetër, zyrtarët në Teheran kanë këmbëngulur se programi i tyre bërthamor është për qëllime paqësore dhe se nuk synojnë ndërtimin e armëve bërthamore.
Pjesa më e madhe e fjalimit u përqendrua te ekonomia, një fokus që republikanët e kishin inkurajuar ndërsa vendi i afrohet zgjedhjeve të mesmandatit./teve1.info/
