Tetë ditë deri në përfundim të afatit kushtetues për zgjedhjen e presidentit të ri, ende nuk një propozim nga partitë politike e as ndonjë marrëveshje.
Të dielën dhe të hënën kryeministri i Kosovës, Albin Kurti njëherit kryetar i LVV-së ka zhvilluar takimet e para me liderin e PDK-së, Bedri Hamza dhe atë të LDK-së, Lumir Abdixhiku.
Pas këtyre takimeve që u zhvilluan të dielën dhe të hënën nuk pati ndonjë propozim për ndonjë emër konkret për president, madje u tha se nuk është folur për emra të përveçëm, por për parimet e zgjedhjes së kreut të ri të shtetit.
Deri tash emri i vetëm është ai i presidentes aktuale, Vjosa Osmani e cila ka shprehur synimet edhe për një mandat.
Kurti, pas takimit të së hënës që zhvilloi me Abdixhikun, tha se nuk janë të interesuar për të shkuar në zgjedhje, por e ka vlerësuar si jo të lehtë zgjedhjen e presidentit.
“Na duhet një shumicë që i afrohet 85 votave. Nuk është situatë e lehtë. Do t’i intensifikojmë bisedimet që të kemi një zgjidhje për çështjen e presidentit”, tha ndër të tjera Kurti.
Konsensus për zgjedhjen e presidentit tha se duhet edhe kryetari i LDK-së, Lumir Abdixiku pas takimit me Kurtin.
Ai tha se LDK vlerëson se ekzistojnë dy rrugë të qëndrueshme përpara: një konsensus i gjerë parlamentar rreth një emri të përbashkët për President, ose një marrëveshje politike ndërmjet partive parlamentare.
“Në të dyja rastet, kërkohet mbështetja e së paku dy të tretave të deputetëve të Kuvendit të Kosovës; dhe ditët në vijim do të na tregojnë se cila rrugë do të jetë e mundshme. Nëse asnjëra, vendit i vijnë zgjedhjet, një skenar i panevojshëm në këtë kohë”, ka shtuar Abdixhiku.
Kryetari i PDK-së, Bedri Hamza pas takimit të së dielës me Kurtin tha se nuk janë pengesë e procese shtetërore, duke dhënë qëndrim se nuk votojnë asnjë kandidaturë që nuk përfaqëson unitet qytetar.
“Si subjekt politik opozitar, nuk kemi qenë dhe nuk jemi pengesë e proceseve shtetërore, por as nuk mbështesim kandidatura që nuk përfaqësojnë unitetin qytetar, sipas frymës kushtetuese. Uroj që të ketë reflektim nga ata që e kanë përgjegjësinë kushtetuese për të propozuar kandidatura me mbështetje të gjerë, duke shmangur kalkulimet afatshkurtra partiake. Stabiliteti institucional është jetik dhe duhet të trajtohet si i tillë. Për ne, interesi shtetëror është mbi çdo kalkulim politik dhe këtë standard e mbrojmë me vendosmëri”, shkroi Hamza./teve1.info/
