Kryetari i PDK-së, Bedri Hamza ka shkruar pas takimit që ka zhvilluar me kryeministrin Albin Kurti, ku është diskutuar edhe zgjedhja e presidentit.
Hamza ka thënë se si parti nuk janë pengesë e proceseve shtetërore, por është shprehur se nuk do të votojnë asnjë kandidat që nuk përfaqësojnë unitetin qytetar
“Zgjedhja e Presidentit nuk është çështje vetëm e një partie, por e të gjithë neve si përfaqësues të zgjedhur të popullit. Për këtë arsye, sot iu përgjigja pozitivisht ftesës së z. Kurti për të diskutuar për zhvillimet politike dhe procesin e zgjedhjes së Presidentit të ri të vendit. Si subjekt politik opozitar, nuk kemi qenë dhe nuk jemi pengesë e proceseve shtetërore, por as nuk mbështesim kandidatura që nuk përfaqësojnë unitetin qytetar, sipas frymës kushtetuese”, ka shkruar Hamza.
Hamza ka thënë se duhet të ketë reflektim nga “ata që e kanë përgjegjësinë kushtetuese për të propozuar kandidatura me mbështetje të gjerë, duke shmangur kalkulimet afatshkurtra partiake. Stabiliteti institucional është jetik dhe duhet të trajtohet si i tillë”, ka shkruar Hamza.
