Sekretari i Sigurisë së Meksikës, Omar Garcia Harfuch, tha të hënën se 25 anëtarë të Gardës Kombëtare mbetën të vdekur në Jalisco në gjashtë sulme të ndara pas vrasjes së udhëheqësit të Kartelit të Gjeneratës së Re të Jalisco-s, Nemesio Oseguera Cervantes.
Oseguera Cervantes, i njohur si “El Mencho”, ishte shefi i një prej rrjeteve kriminale me rritjen më të shpejtë në Meksikë, i njohur për trafikimin e fentanilit, metamfetaminës dhe kokainës në Shtetet e Bashkuara dhe për organizimin e sulmeve kundër zyrtarëve qeveritarë që e sfidonin atë.
Ai u vra gjatë një shkëmbimi zjarri në shtetin e tij të lindjes, Jalisco, ndërsa ushtria meksikane u përpoq ta kapte. Anëtarët e kartelit u përgjigjën me dhunë në të gjithë vendin, duke bllokuar rrugët dhe duke u vënë flakën automjeteve.
Gjithashtu u vranë një roje burgu, një agjent nga zyra e prokurorit të shtetit dhe një grua të cilën García Harfuch nuk e identifikoi. Ai tha gjithashtu se rreth 30 të dyshuar për krime u vranë në Jalisco dhe katër të tjerë u vranë në Michoacan, raporton AP.
Disa shtete meksikane anuluan shkollat të hënën, me qeveritë lokale dhe të huaja që i paralajmëruan qytetarët e tyre të qëndronin brenda pas shpërthimit të dhunës së përhapur.
Shtëpia e Bardhë konfirmoi se SHBA-ja ofruan mbështetje të inteligjencës për operacionin për kapjen e udhëheqësit të kartelit dhe duartrokiti ushtrinë e Meksikës për kapjen e tij.
