Ministri i Financave nga Lëvizja Vetëvendosje, Hekuran Murati, deklaroi gjatë seancës plenare ku po shqyrtohet Projektbuxheti 2026 se ky buxhet ka karakter të përkohshëm dhe emergjent.
Murati bëri të ditur se të gjitha amendamentet janë shqyrtuar dje në komision dhe theksoi nevojën për miratimin e shpejtë të tij.
“Gjatë ditës së djeshme në komision kemi shqyrtuar të gjitha amendamentet dhe ajo që mund të them është ta rikonfirmoj atë që e tha edhe deputeti Besnik Tahiri, sapo e tha dhe e kërkoi të konfirmohet. Siç e kemi thënë edhe në fillim, ky është një buxhet i përkohshëm emergjent dhe për këtë arsye ne si Qeveri nuk ua kemi dhënë hapësirën as ministrive që i kanë marrë dikasteret e tyre përsipër që të bëjnë ndryshime, duke konsideruar se nuk kemi shumë kohë për të bërë ndryshimet e nevojshme dhe në mënyrë cilësore, në mënyrë që ato pastaj të mos reflektojnë me probleme gjatë rrugës”, tha Murati.
Ai shtoi se urgjenca e këtij buxheti lidhet me nevojën për funksionimin normal të institucioneve dhe garantimin e shërbimeve për qytetarët.
“Projektbuxheti 2026 po shqyrtohet sot në lexim të dytë dhe është i përkohshëm dhe emergjent. Me zgjatjet që bëhen sipas ligjit në mungesë të buxhetit, kjo është një zgjidhje emergjente për shpenzimet rrjedhëse. Për projekte të tjera dhe inicimin e prokurimeve, asnjë aktivitet nuk mund të iniciohet pa buxhet në fuqi”, theksoi Murati.
Ai gjithashtu theksoi rëndësinë që Qeveria të procedojë sa më shpejt buxhetin:
“Po e miratojmë këtë buxhet që të ketë një bazë mbi të cilën edhe komunat e organizatat tjera buxhetore të mund të ushtrojnë veprimtarinë e tyre pa problem, e më pas prioritetet e Qeverisë dhe të komunave të kenë mundësi t’i shtojnë apo reflektojnë gjatë rishikimit. Kërkesa jonë ka qenë të mos ketë amandamente, meqë është buxhet i përkohshëm”, përfundoi Murati.
