Gazetarët palestinezë kanë vuajtur tortura dhe abuzim sistematik në paraburgimet izraelite, duke përfshirë rrahjen, urinë, dhunën seksuale dhe neglizhencën mjekësore, për shkak të punës së tyre që nga lufta në Gaza, tha të enjten Komiteti për Mbrojtjen e Gazetarëve (CPJ).
Organizata me seli në Nju Jork tha në një raport se të paktën 94 gazetarë palestinezë – 32 nga Gaza, 60 nga Bregu Perëndimor dhe dy nga Izraeli – dhe një punonjës mediash ishin ndaluar nga ushtria izraelite që nga tetori i vitit 2023.
Dëshmitë e dhëna nga 59 gazetarë që ishin liruar treguan se ata ishin abuzuar, rrahur, lënë të uritur dhe iu nënshtruan dhunës seksuale, përfshirë përdhunimin, në burgjet izraelite.
Shumë prej tyre përshkruan gjithashtu kërcënime psikologjike, pozicione stresuese që shkaktonin dhimbje të zgjatur dhe ekspozim të zgjatur ndaj tingujve me volum të lartë, përfshirë muzikën e vazhdueshme. Organizata tha se shqyrtoi fotografi, raporte mjekësore dhe dokumente ligjore të ofruara nga gazetarët e liruar.
“Raportimi i CPJ tregon një model të qartë se si u trajtuan gazetarët palestinezë nën paraburgimin izraelit”, tha në një deklaratë drejtoresha ekzekutive e CPJ, Jodie Ginsberg.
“Shkalla dhe qëndrueshmëria e këtyre dëshmive tregojnë për diçka shumë më tepër se sjellje të izoluara të pahijshme.”
Sipas Komitetit për Mbrojtjen e Gazetarëve (CPJ), më shumë se 80 përqind (48 nga 58) e gazetarëve palestinezë të liruar nuk u akuzuan kurrë për ndonjë krim dhe u mbajtën sipas sistemit të paraburgimit administrativ të Izraelit, i cili lejon mbajtjen e palestinezëve pa akuza dhe mund të rinovohet pafundësisht.
Të paktën 21 persona thanë se u ishte mohuar përfaqësimi i duhur ligjor, me 17 prej tyre që deklaruan se nuk u lejohej fare të flisnin me një avokat.
“Kur dhjetëra gazetarë përshkruajnë në mënyrë të pavarur abuzimin fizik dhe psikologjik, bashkësia ndërkombëtare duhet të ndërmarrë veprime”, tha Ginsberg.
“E drejta humanitare përcakton standarde të qarta për trajtimin e të ndaluarve dhe duhet të ketë përgjegjësi kuptimplote për mospërmbushjen e këtyre standardeve.”
Organizata u bëri thirrje autoriteteve izraelite që t’u lejojnë monitoruesve të pavarur ndërkombëtarë, përfshirë raportuesit specialë të OKB-së, qasje në qendrat e paraburgimit dhe të nisin hetime transparente dhe të paanshme për të gjitha akuzat.
Sipas shifrave zyrtare palestineze, më shumë se 9,300 palestinezë mbahen aktualisht në burgjet izraelite, përfshirë 66 gra dhe 350 fëmijë./AA
