Ferid Berisha, i njohur si komandant “Shkupi”, është shprehur i bindur se ish-krerët e Ushtrisë Çlirimtare të Kosovës (UÇK), Hashim Thaçi, Kadri Veseli, Rexhep Selimi dhe Jakup Krasniqi, të cilët po gjykohen në Hagë, do të lirohen së shpejti.
Në një intervistë në emisionin “410” në Tëvë1, Berisha ka deklaruar se procesi gjyqësor ndaj tyre tejkalon individët dhe, sipas tij, përfaqëson një gjykim ndaj Kosovës dhe kombit shqiptar në tërësi.
“Kjo padrejtësi që i ka ndodhur Kosovës, unë kam shumë shpresë që do të shndërrohet në një shpërblim të madh për ne. Besoj se gjatë javëve apo muajve të ardhshëm do të kemi lajmin për lirimin e tyre. Sepse aty nuk po gjykohet as Thaçi, as Veseli, as Krasniqi, as UÇK-ja, por po gjykohet Kosova dhe kombi shqiptar”, është shprehur Berisha.
Ai ka shtuar se pret që ish-krerët e UÇK-së të kthehen sa më shpejt në vend dhe ka uruar që procesi gjyqësor të mos ketë pasoja për shtetin dhe popullin e Kosovës./teve1.info/
