Avokati Geoffrey Roberts ka nisur paraqitjen e fjalës përfundimtare në emër të Rexhep Selimit, duke theksuar se klienti i tij është i pafajshëm dhe duhet të lirohet nga të gjitha akuzat.
Gjatë paraqitjes së tij, Roberts argumentoi se Zyra e Prokurorit të Specializuar nuk ka arritur të dëshmojë përtej dyshimit të arsyeshëm pretendimet ndaj Selimit, përfshirë akuzën se ai ka qenë pjesë e një “ndërmarrjeje të përbashkët kriminale” me qëllim të shtrirjes së pushtetit në Kosovë.
“Selimi është tërësisht i pafajshëm për të gjitha krimet në aktakuzë. ZPS-ja thjesht nuk ka arritur të provojë asnjë prej këtyre krimeve të pretenduara. Kaq është dhe ky është qëndrimi ynë”, tha ai.
Sipas mbrojtjes, aktakuza përfshin gjithsej dhjetë pika – gjashtë për krime kundër njerëzimit dhe katër për krime lufte – por, siç u theksua, Prokuroria nuk ka hequr dorë nga asnjë prej tyre gjatë fjalëve përmbyllëse. Në këtë kontekst, ekipi mbrojtës këmbëngul se nuk ekzistojnë prova të mjaftueshme që e lidhin Selimin me veprat e pretenduara.
Mbrojtja vlerëson se thelbi i çështjes së Prokurorisë mbështetet në pretendimin për ekzistencën e një ndërmarrjeje të përbashkët kriminale, pretendim që, sipas tyre, nuk është vërtetuar me prova bindëse.
Pas Roberts, fjalën pritet ta marrin edhe anëtarë të tjerë të ekipit mbrojtës, ndërsa në përmbyllje Selimi do të ketë sërish mundësinë të deklarohet.
