Ministrja e Drejtësisë, Donika Gërvalla, ka uruar Glauk Konjufcën për emërimin e tij si zëvendëskryeministër dhe Ministër i Punëve të Jashtme dhe Diasporës në Qeverinë Kurti 3.
Përmes një postimi në Facebook, Gërvalla ka vlerësuar lart angazhimin e Konjufcës në mandatin e kaluar, duke theksuar se në Qeverinë Kurti II, në cilësinë e Kryetarit të Kuvendit të Republikës së Kosovës, ai ka treguar maturi të lartë, aftësi të jashtëzakonshme për bashkëpunim dhe një sens të fortë për unitet gjithëpërfshirës.
“Ai ka ditur të udhëheqë me vizion dhe vendosmëri, duke e bërë Kuvendin, ashtu si i ka hije, institucionin më të fortë dhe më të përfaqësueshëm për qytetarët e Republikës sonë”, ka shkruar Gërvalla.
Ajo i ka uruar Konjufcës suksese në detyrën e re, duke shprehur bindjen se kontributi i tij do ta forcojë më tej diplomacinë e Republikës së Kosovës në arenën ndërkombëtare.
Sipas saj, angazhimi i tij do të ndikojë në promovimin e interesave të vendit, avancimin e marrëdhënieve me partnerët strategjikë dhe në ndërtimin e një të ardhmeje më të fortë dhe më të sigurt për qytetarët.
