Paraqitja solide e Edon Zhegrovës në barazimin 2:2 kundër Lazios, ka bërë që te Juventusi të presin edhe më shumë nga sulmuesi i krahut në ndeshjet tjera.
Zhegrova luajti gjatë tërë pjesës së dytë ndaj Lazios dhe pati ndikim në lojën e “Zonjës së Vjetër”, ku krahas driblimeve, pasimeve dhe dy gjuajtjeve të rrezikshme, ai ishte i përfshirë direkt në aksionin prej të cilit Juventusi shënoi golin e parë.
Të hënën, Juventusi u rikthye në stërvitje dhe menjëherë publikoi pamje të Zhegrovës, i cili ishte i pandalshëm, ku shihej duke shënuar gola, duke asistuar dhe duke dribluar me lehtësi.
Madje, Juventusi i kishte vënë një përshkrim të veçantë, duke e quajtur yllin e Kosovës me nofkën “Luan”.
Duket se pas vështirësive, Zhegrova ka rikthyer formën e tij fizike dhe te Juventusi presin shumë prej 26-vjeçarit.
Ai u transferua te Juventusi nga Lille dhe këtë sezon për ekipin italian ka 18 paraqitje në të gjitha garat apo në total 374 minuta lojë.
