Nga sot nis maratona e fjalëve përfundimtare në gjykimin kundër katërshes së UÇK-së.
Për dy javë rresht mbrojtjet e Hashim Thaçit, Kadri Veseli, Jakup Krasniqi e Rexhep Selimit, do të kenë përballjen e fundit me organin akuzues.
Pesë ditë janë rezervuar për fjalët përfundimtare të ekipeve mbrojtëse, dhe deklaratat përmbyllëse të të akuzuarve.
Pikërisht këto deklarime, sipas njohësve të fushës pritet që t’ia japin vulën këtij procesi.
“Pala mbrojtëse është bukur në avantazh me prokurorinë, për faktin se kemi parë dëshmitarë ndonëse të paktë në numër, por që dëshmitë e tyre kanë qenë jashtëzakonisht relevante për procesin dhe kanë qenë dëshmitarë jashtëzakonisht të besueshëm. Mbi bazën e asaj që kemi parë, besoj se nuk është arritë me u argumentu tezat e prokurorisë, për sa i përket çështjes së ekzistimit të hierarkisë dhe strukturës komanduese, si dhe mundësisë së ushtrimit të kontrollit në mënyrë efektive, dy elemente bazë për caktimin e përgjegjësisë komanduese”, thotë avokati Ardian Bajraktari.
Përgjatë këtyre pesë ditëve, më 11, 12, 13, 16 dhe 18 shkurt, vlerësohet se do të përmbysen akuzat e Zyrës së Prokurorit të Specializuar për krime lufte dhe ndërmarrje të përbashkët kriminale.
“Po besoj dhe jam i bindur se në fund do të dalin fitimtarë përpara kësaj Gjykate të padrejtë, e cila me qëllime dhe tendenca është mundu me njollos luftën e drejtë të Ushtrisë Çlirimtare të Kosovës”, thotë Xhevdet Qeriqi nga shoqata e invalidëve të luftës.
Paraprakisht, më 9 dhe 10 shkurt fjalët e fundit do t’i thonë prokuroria dhe mbrojtja e viktimave.
Në këtë gjykim që ka zgjatur 227 ditë, kanë marrë pjesë 155 viktima e janë dëgjuar 125 dëshmitarë të prokurorisë, dy nga mbrojtja e viktimave dhe 7 dëshmitarë të mbrojtjes.
Që nga nëntori i vitit 2020, që ku katërshja u arrestua e u dërgua në paraburgim, 24 herë u rishikua masa e paraburgimit, por që asnjëherë nuk u ndryshua.
