Kryetari i Partisë Demokratike të Kosovës (PDK), Bedri Hamza, ka përkujtuar 27-vjetorin e Konferencës së Rambujesë, duke e cilësuar atë si një moment vendimtar në historinë e Kosovës.
Përmes një postimi në Facebook, Hamza ka theksuar se nën udhëheqjen e Hashim Thaçit, në cilësinë e kryesuesit të delegacionit, Kosova zgjodhi paqen, lirinë dhe anën e drejtë të historisë.
Ai ka rikujtuar se nëntë vjet pas Konferencës së Rambujesë u shpall edhe Pavarësia e Kosovës.
“Më 6 shkurt 1999 filloi Konferenca e Rambujesë, një moment vendimtar në historinë tonë. Kosova foli dhe vendosi për vetveten. Nën udhëheqjen e Hashim Thaçit, si kryesues i delegacionit, zgjodhëm paqen, lirinë dhe anën e drejtë të historisë. Nëntë vjet më vonë, shpallëm edhe Pavarësinë e Kosovës”, ka shkruar ai.
Hamza ka shtuar se e ardhmja euroatlantike e Kosovës kërkon drejtësi dhe liri edhe për ish-pjesëtarët e Ushtrisë Çlirimtare të Kosovës që po gjykohen në Hagë, duke i cilësuar ata si faktorë të stabilitetit dhe ndërtues të vizionit perëndimor të shtetit të Kosovës.
“Sot nderojmë heronjtë tanë dhe falënderojmë të gjithë aleatët, që na mbështetën në çdo hap të lirisë dhe shtetndërtimit. E ardhmja euroatlantike e Kosovës kërkon drejtësi e liri edhe për çlirimtarët tanë në Hagë, të cilët gjithnjë kanë qenë faktorë të stabilitetit dhe ndërtues të vizionit perëndimor të shtetit tone”, ka përfunduar Hamza./teve1.info/
