Presidenti i Libanit, Joseph Aoun, e ka akuzuar Izraelin për kryerjen e një krimi mjedisor, pasi forcat izraelite spërkatën një substancë të panjohur mbi qytetet jugore libaneze, të cilat Bejruti i përshkroi si toksike.
Aoun dënoi veprimin izraelit të mërkurën, duke thënë se u urdhëroi agjencive qeveritare të ndërmarrin të gjitha masat diplomatike dhe ligjore për t’iu “përgjigjur këtij agresioni”, të cilin ai e quajti një “shkelje flagrante” të sovranitetit të Libanit.
“Ky është një krim mjedisor dhe shëndetësor kundër qytetarëve libanezë dhe tokës së tyre”, u citua të thoshte Aoun nga Agjencia Kombëtare e Lajmeve e Libanit.
Ai shtoi se incidenti është një “vazhdim i sulmeve të përsëritura izraelite ndaj Libanit dhe popullit të tij”.
Natyra e saktë e kimikatit mbetet e paqartë, shkruan Al Jazeera.
Që kur Hezbollahu dhe Izraeli arritën një marrëveshje armëpushimi në nëntor 2024, Izraeli ka sulmuar Libanin pothuajse çdo ditë duke shkelur marrëveshjen.
Izraeli vazhdon të mbajë të pushtuar pesë pika brenda territorit libanez, ndërsa bllokon rindërtimin e disa fshatrave kufitare që i rrafshoi me tokë, duke penguar dhjetëra mijëra njerëz të zhvendosur të kthehen në shtëpitë e tyre.
