Edhe pse afati kalimtar i dimrit nuk ishte më i bujshmi në histori, Karim Benzema ka arritur të jetë protagonist absolut i saj. Në moshën 38-vjeçare, sulmuesi francez ka realizuar “bombën” e fundit të merkatos duke braktisur skuadrën arabe, Al Ittihad dhe duke u transferuar te rivali Al Hilal, një lëvizje që ka tronditur themelet e futbollit saudit dhe ka vënë në hije edhe ndikimin e Cristiano Ronaldos.
Gjithçka nisi pak ditë më parë, kur gazeta franceze “L’Équipe” raportoi se Benzema nuk kishte ndërmend të rikthehej më te Al Ittihad, pavarësisht se kontrata e tij përfundonte pas gjashtë muajsh. Shkak për këtë vendim ishte një ofertë rinovimi që francezi e konsideroi fyese për karrierën e tij, sidomos duke pasur parasysh se ai mbërriti në Jeddah në verën e vitit 2023, si fitues aktual i ‘Topit të Artë’.
Në këtë situatë hyri në lojë Al Hilal, gjithashtu nën menaxhimin e Public Investment Fund (PIF), duke përfituar nga pakënaqësia e Benzemas. Ky veprim ndezi menjëherë zemërimin e Cristiano Ronaldos, i cili ndjen se klubet e kontrolluara nga PIF nuk trajtohen në mënyrë të barabartë. Statistikat e mbështesin këtë perceptim: që nga vera e vitit 2023, Al Hilal ka investuar rreth 215 milionë euro më shumë se Al Nassr, Al Ittihad dhe Al Ahli.
Me firmën e Benzemas te Al Hilal, duket se Cristiano Ronaldo u rebelua, duke refuzuar të luante në ndeshjen kundër Al Riyadh, e cila përfundoi me fitore minimale për skuadrën e Jorge Jesus falë golit të Sadio Mané pas asistit të João Félix. Tani mbetet për t’u parë nëse CR7 do të qëndrojë i palëkundur apo do të kthehet në fushë për të vazhduar ndjekjen e objektivit historik të 1,000 golave në karrierë.
Gara për titullin në Saudi Pro League është më e nxehtë se kurrë. Më 19 shkurt, Benzema do të përballet me ish-skuadrën e tij Al Ittihad, këtë herë i veshur me fanellën blu të Al Hilal. Ndërsa në fillim të majit, tre javë para fundit të kampionatit, pritet derbi i madh i Riadit kundër Al Nassr. Pyetja e madhe mbetet: a do të jetë aty edhe Cristiano Ronaldo?
