Kryetari i Lidhjes Demokratike të Kosovës (LDK), Lumir Abdixhiku, ka thënë se shpreson që Kuvendi i partisë, që do të mbahet sot, të shënohet me maturitet politik dhe diskutime të hapura për të ardhmen e partisë. Ai ka theksuar se ky Kuvend duhet të jetë një shembull i mirë jo vetëm për LDK-në, por edhe për partitë tjera politike në Kosovë.
Para se të hynte në Kuvend, Abdixhiku u shpreh për mediat se synon që kjo ditë të jetë një moment reflektimi dhe maturiteti për partinë.
“Do të dëshiroja që kjo ditë të shënohet me maturitet politik, me diskutime dhe debate të hapura. Le të jetë ky një standard i mirë, i mbarë, jo vetëm për LDK-në, por edhe për partitë tjera politike në vend”, tha ai.
Kryetari Abdixhiku, i cili është nën presion pas rezultatit të dobët të LDK-së në zgjedhjet e 28 dhjetorit, ka siguruar anëtarët e partisë se Kuvendi do të jetë vendimtar për të ardhmen e LDK-së dhe për procesin e votëbesimit për punën e tij.
“I siguroj të gjithë anëtarësinë e LDK-së se nga kjo ditë do të dalim edhe më të unifikuar, më të fortë, edhe më të gatshëm për të ardhmen e mirë që na pret përpara”, ka shtuar Abdixhiku.
Ai ka theksuar se Kuvendi i partisë është organi më i lartë dhe ai që do të përcaktojë fatin politik të çdo anëtari dhe të orientimin e partisë për të ardhmen.
“Ky është Kuvendi i LDK-së, organi më i lartë. Ai ka të drejtë të vendosë për gjithçka. Në këtë rrethanë, unë do të kem një fjalim dhe më pas Kuvendi do të vendosë për të ardhmen politike dhe për të secilin”, tha Abdixhiku.
Në lidhje me mundësinë e konfirmimit të tij si kryetar, ai u përgjigj duke theksuar se do të lërë vendimimin për anëtarësinë e partisë, pa asnjë ndikim të jashtëm.
“Kam bërë gjënë më fisnike, që t’ia lë këtë fat anëtarësisë dhe besoj se anëtarësia jonë është e matur, ka përkushtim për LDK-në, nevojat e LDK-së dhe do të marrë vendim të lirë pa asnjë presion politik. Mirësevini në demokraci. Kuvendi është i lirë që të vendosë”, ka thënë ai.
Kuvendi i LDK-së pritet të jetë një moment kyç për të ardhmen e partisë, duke hapur mundësinë për vendime të rëndësishme për strukturën dhe udhëheqjen e saj.
