Kryeministri i Hungarisë, Viktor Orban, ka akuzuar të hënën Ukrainën se po përpiqet të ndërhyjë në zgjedhjet e ardhshme të vendit të tij dhe urdhëroi që ambasadori i Kievit të thirret në Ministrinë e Jashtme.
Orban, i cili ka mbajtur lidhje të ngushta me Rusinë , përballet me atë që pritet të jetë sfida më e madhe e 16 viteve të tij në pushtet gjatë zgjedhjeve të planifikuara për 12 prill, shkruan AP.
Në një video të postuar në mediat sociale të hënën, Orban tha se udhëheqësit politikë të Ukrainës, dhe “madje edhe vetë presidenti, bënë deklarata tepër ofenduese dhe kërcënuese kundër Hungarisë dhe qeverisë hungareze”.
“Shërbimet tona të sigurisë kombëtare kanë vlerësuar këtë sulm të fundit ukrainas dhe kanë përcaktuar se ajo që ndodhi është pjesë e një serie masash të koordinuara ukrainase për të ndërhyrë në zgjedhjet hungareze”, tha Orban, duke shtuar se i kishte udhëzuar ministrit të jashtëm të thërriste ambasadorin e Ukrainës.
Duke folur në Forumin Ekonomik Botëror në Davos të Zvicrës javën e kaluar, Presidenti ukrainas Volodymyr Zelenskyy kritikoi Orbanin, duke thënë se ai “jeton me paratë evropiane, ndërsa përpiqet të shesë interesat evropiane”.
