Presidenti i Lazios, Claudio Lottito, është bërë përsëri protagonist me një gafë të rëndë, teksa në rrjete sociale ka qarkulluar sot një telefonatë e tij, ku shpjegonte se shumë prej yjeve të ekipit ishin larguar për shkak të trajnerit Sarri.
“Lojtarët ikin nga Lazio pasi nuk shkojnë mirë me Sarrin”, dëgjohet të thotë presidenti i bardhekaltërve, në një telefonatë e cila padyshim do të tensionojë edhe më shumë raportin me trajnerin i cili është ankuar vazhdimisht për situata të ndryshme në klub.
Kësisoj, Lottito është detyruar të dalë me një deklaratë publike në mbrojtje të trajnerit në emër të tij dhe të lojtarëve. “Dua të jem jashtëzakonisht i qartë një herë e përgjithmonë. Te Lazio nuk ka lojtarë kundër trajnerit. Maurizio Sarri gëzon besimin e plotë të klubit, ashtu si edhe gatishmërinë totale dhe respektin nga e gjithë skuadra”, shkruhej ndër të tjera në reagimin e publikuar nga bardhekaltrit në emër të presidentit.
