Avokati Arbër Jashari ka komentuar për masivitetin e manipulimeve gjatë procesit të rinumërimit të votave, duke theksuar se shkeljet kanë qenë aq të mëdha sa ngrihet dyshimi për tendencë të qartë për manipulim të vullnetit të qytetarëve.
Ai thotë se drejtësia nuk mund të ndalet vetëm tek komisionarët e dyshuar, por edhe te personat e tjerë që kanë pasur ndikim.
“Ka qenë e pritshme pas asaj që ne e kemi parë për gjatë këtyre javëve dhe është pritë që Prokuroria do të reagojë. Mospërputhja e rezultateve me të numërimit me ato të rinumërimit ka qenë aq e madhe dhe manipulimi aq i madh ka qenë sa me të drejtë bëhet fjalë për tendencë të manipulimit të vullnetit të qytetarëve”, deklaroi ai në emisionin “Ditari” në Tëvë1.
Avokati shprehet optimist që drejtësia do t’i zbardh të gjitha manipulimet.
“Nuk janë vetëm komisionarët manipulues ose të dyshuarit kryesorë, drejtësia nuk është e plotë nëse nuk gjendet edhe personat, të cilët i kanë shtyrë ose i kanë porositur ose në çfarëdo forme kanë ndikuar. Këta persona domosdoshmërish nuk mund të jenë vetëm kandidatët për deputetë, mund të jenë nga shtabi i tyre, njerëzit e afërt. Të gjitha këto do t’i zbardh drejtësia”, tha ai.
